പത്തനംതിട്ട:കൊവിഡ് ചികിത്സ കേന്ദ്രത്തില്‍ (സി.എഫ്.എല്‍.ടി.സി) പ്രായപൂർത്തിയാകാത്ത പെൺകുട്ടിയെ പീഡിപ്പിച്ച തല്‍ക്കാലിക ജീവനക്കാരന്‍ അറസ്റ്റില്‍. ചെന്നീര്‍ക്കര ഊന്നുകല്‍ മുള്ളൻകുഴിയില്‍ ബിനുവിനെ (30) ആണ് ആറന്മുള പൊലീസ് അറസ്റ്റു ചെയ്തത്.
ഈ മാസം ഒന്നിനാണ് സംഭവം നടന്നത്. ഇലന്തൂർ സ്വദേശിനിയായ പതിനാറുകാരി കഴിഞ്ഞ മാസം 27നാണ് കൊവിഡ് പോസിറ്റീവായി സി.എഫ്.എല്‍.ടി.സിയില്‍ ചികിത്സയ്‌ക്കെത്തിയത്. തുടര്‍ന്ന് പെൺകുട്ടിയുമായി സൗഹൃദം സ്ഥാപിച്ച പ്രതി ഇവിടെ വച്ച് പീഡിപ്പിച്ചെന്നാണ് പരാതി.
കൊവിഡ് മുക്തയായതിനെ തുടർന്ന് 2ന് പെൺകുട്ടിയെ ഡിസ്ചാർജ് ചെയ്തിരുന്നു. വീട്ടുകാർ കൊവിഡ് നിരീക്ഷണത്തിലായിരുന്നതിനാൽ പെൺകുട്ടിയോട് ഓട്ടോറിക്ഷയിൽ വീട്ടിലേക്കെത്താൻ ആവശ്യപ്പെട്ടിരുന്നു. എന്നാൽ പ്രതി പെൺകുട്ടിയെ കാറിൽ കോഴഞ്ചേരി ബസ്‌ സ്റ്റാൻഡിലെത്തിച്ച ശേഷം കടന്നുകളഞ്ഞു.