മലകയറാൻ പോയ യുവാവ് പാറകള്‍ക്കിടയില്‍ കുടുങ്ങിയിട്ട് 24മണിക്കൂര്‍ പിന്നിട്ടു; രക്ഷാപ്രവര്‍ത്തനം തുടരുന്നു

ചെറാട്ടിൽ റഷീദയുടെ മകൻ ബാബു (21) ആണ് കുടുങ്ങിയത്.

പാലക്കാട്: മലമ്പുഴ എലിച്ചിരം മലയോട് ചേർന്ന്‌ കൂർമ്പാച്ചിമല കയറാൻ പോയ യുവാവ്‌ തിരികെ വരാനാവാതെ കുടുങ്ങി. ചെറാട്ടിൽ റഷീദയുടെ മകൻ ബാബു ആണ് (21) കുടുങ്ങിയത്. തിങ്കൾ രാവിലെ ബാബുവിനോടൊപ്പം മലകയറാൻ പോയ പ്രദേശവാസികളായ രണ്ടു പേർ പാതിവഴിയിൽ മടങ്ങിയെങ്കിലും ബാബു വീണ്ടും മലകയറി. ഇയാള്‍ കുടുങ്ങിയിട്ട് 24 മണിക്കൂറായിട്ടും രക്ഷിക്കാനായിട്ടില്ല.

കാണാതായതിനെ തുടർന്ന്‌ നടത്തിയ തെരച്ചിലിൽ രണ്ടു പാറകൾക്കിടയിൽ യുവാവ് കിടക്കുന്നതു കണ്ടെങ്കിലും രക്ഷപ്പെടുത്താനായില്ല. പകൽ 2.30ന് വിവരം അറിയിച്ചതിനെ തുടർന്ന് വനപാലകരും പൊലീസും അഗ്നിശമന സേനയും സ്ഥലത്തെത്തി തിരച്ചിൽ നടത്തി. യുവാവ് കിടക്കുന്ന സ്ഥലം കണ്ടെത്തിയെങ്കിലും അവിടേക്ക്‌ എത്താനാവാത്ത സാഹചര്യമാണ്. ഇയാളുടെ കാലിന്‌ ഗുരുതര പരിക്കേറ്റതായി പറയുന്നു.

മൊബൈൽ ഫോണിന്‌ റേഞ്ചില്ലാത്തതും വെളിച്ചക്കുറവുമാണ് പ്രതിസന്ധിയായത്‌. രക്ഷാപ്രവർത്തകർ ഇയാൾ കിടക്കുന്ന സ്ഥലത്തിന്‍റെ അടുത്തെത്തിയിട്ടുണ്ട്. ചൊവ്വാഴ്ച ഉച്ചയ്ക്കും ശ്രമം തുടരുകയാണ്.