പാലക്കാട് : മീനാക്ഷിപുരത്ത് സ്വര്‍ണ വ്യാപാരിയെ ബസില്‍ നിന്നിറക്കി കൊണ്ടുപോയി സ്വര്‍ണവും പണവും മൊബൈല്‍ ഫോണും കവര്‍ന്ന കേസില്‍ രണ്ട് പേര്‍ അറസ്റ്റില്‍. വിളയോടി അത്തിമണി സ്വദേശി ശ്രീജിത്ത് (28), പാലക്കാട് നൂറണി സ്വദേശി ബി. ബവീർ (31) എന്നിവരാണ് അറസ്റ്റിലായത്. 30 ലക്ഷം രൂപ വിലമതിക്കുന്ന സ്വര്‍ണവും 23,000 രൂപയും മൊബൈല്‍ ഫോണുമാണ് കവര്‍ന്നത്.
തൃശൂര്‍ കല്ലൂര്‍ പുതുക്കോട് സ്വദേശി റാഫേലിന്‍റെ പരാതിയിലാണ് പൊലീസ് കേസെടുത്തത്. ഇക്കഴിഞ്ഞ 26ന് പുലര്‍ച്ചെ അഞ്ചരയോടെ മീനാക്ഷിപുരം സൂര്യപാറയിലാണ് സംഭവം. തൃശൂരിലെ ജ്വല്ലറിയില്‍ നിന്ന് തമിഴ്‌നാട് മധുക്കരയിലെ ജ്വല്ലറിയിലേക്ക് സ്വര്‍ണം കൊണ്ടുപോയി പ്രദര്‍ശനം കഴിഞ്ഞ് തിരിച്ച് സ്വകാര്യ ബസില്‍ വരുമ്പോഴാണ് സംഭവം. ബസിന് പിന്നാലെ റാഫേലിനെ പിന്‍തുടര്‍ന്ന സംഘം സൂര്യപാറയിലെത്തിയപ്പോള്‍ ബസിന് കുറുകെ കാര്‍ നിര്‍ത്തി ഇയാളെ ബലമായി പിടിച്ചിറക്കി.