പാലക്കാട്: മമ്പറത്ത് ആർഎസ്എസ് പ്രവർത്തകന്‍ സജിത്തിന്‍റെ കൊലപാതക കേസില്‍ പോപ്പുലർ ഫ്രണ്ട് മലപ്പുറം പുത്തനത്താണി ഏരിയ പ്രസിഡന്‍റ് അറസ്റ്റിൽ. പുന്നത്തല പുതുശേരിപ്പറമ്പിൽ അബ്‌ദുൾ ഹക്കീം (45) ആണ് അറസ്റ്റിലായത്.
പ്രതികളെ സഹായിച്ച ഇയാളെ ജില്ലാ സെഷൻസ് കോടതിയിൽ ഹാജരാക്കി ആലത്തൂർ സബ് ജയിലിൽ റിമാൻഡ് ചെയ്‌തു. എസ്‌ഡിപിഐ, പോപ്പുലർ ഫ്രണ്ട് നേതൃത്വം പ്രതികളെ ഒളിപ്പിക്കാനും സഹായിക്കാനും ഇടപെടുന്നുണ്ടെന്ന വിവരം പൊലീസിന് ലഭിച്ചിരുന്നു.
അതേസമയം മലബാറിലെ ജില്ലകളിൽ പ്രതികൾ ഒളിവിലാണെന്ന വിവരം സ്ഥിരീകരിച്ചിട്ടുണ്ട്. ഇവിടങ്ങളിലേക്ക് പ്രത്യേക അന്വേഷക സംഘത്തെ വിന്യസിച്ചു. വരും ദിവസങ്ങളിൽ കൂടുതൽ അറസ്റ്റ് ഉണ്ടായേക്കുമെന്ന് പൊലീസ് അറിയിച്ചു.
കഴിഞ്ഞ ദിവസം ഒറ്റപ്പാലം അമ്പലപ്പാറ കാഞ്ഞിരം ചോല സ്വദേശി ഷംസീർ അറസ്റ്റിലായിരുന്നു. തൃശൂരിൽ നിന്നാണ്‌ ഇയാളെ പിടിച്ചത്‌. ഇതോടെ കേസിൽ എട്ട്‌ പേർ അറസ്റ്റിലായി. പ്രതിക്കായി പൊലീസ് ലുക്ക്‌ഔട്ട് നോട്ടീസ് പുറപ്പെടുവിച്ചിരുന്നു. ഡിസംബർ അവസാനവാരം കൊലപാതകത്തിൽ നേരിട്ട്‌ പങ്കെടുത്തയാളെ അറസ്റ്റ് ചെയ്‌തിരുന്നു.
Also read: സുരക്ഷ വര്‍ധിപ്പിക്കും, ആശുപത്രികളില്‍ സുരക്ഷ ഓഡിറ്റും വരും: മന്ത്രി വീണ ജോര്‍ജ്‌
കൊഴിഞ്ഞാമ്പാറ അത്തിക്കോട് പള്ളിസ്ട്രീറ്റ് സ്വദേശി മുഹമ്മദ് ഹാറൂൺ, ആലത്തൂർ അഞ്ചുമൂർത്തി ചീക്കോട് ഫാത്തിമ മൻസിലിൽ നൗഫൽ, മലപ്പുറം വണ്ടൂർ അർപ്പോയിൽ പുളിവെട്ടി സ്വദേശി ഇബ്രാഹിം മൗലവി (ഇബ്രാഹിം പുളിവെട്ടി മുഹമ്മദ്) എന്നിവർക്കെതിരെ ലുക്ക്‌ഔട്ട് നോട്ടീസ് നിലവിലുണ്ട്.
