പാലക്കാട്ടെ പാടങ്ങള്‍ വീണ്ടും പച്ചപുതക്കുന്നു; രണ്ടാംവിളക്കുള്ള തെയ്യാറെടുപ്പുകൾ തുടങ്ങി

കഴിഞ്ഞ രണ്ടാം വിളക്ക് ജില്ലയിൽ 65000ലേറെ കർഷകർ സംഭരണത്തിനായി രജിസ്റ്റർ ചെയ്‌തിരുന്നു. 1.7 ലക്ഷം മെട്രിക് ടൺ നെല്ലാണ് അന്ന് സംഭരിച്ചത്. ഇത്തവണ വിളവ് കൂടുതൽ മെച്ചപ്പെടുമെന്നാണ് പ്രതീക്ഷിക്കുന്നത്

പാലക്കാട്:ജില്ലയിൽ രണ്ടാംവിള നെൽകൃഷിക്കുള്ള തെയ്യാറെടുപ്പുകൾ ആരംഭിച്ചു. ഒന്നാം വിള നെല്ലുസംഭരണം 90 ശതമാനത്തോളം പൂർത്തിയായതോടെയാണ് കൊയ്തൊഴിഞ്ഞ പാടങ്ങളിൽ രണ്ടാം വിളയ്ക്കുള്ള പ്രാരംഭപ്രവർത്തനങ്ങൾ ആരംഭിച്ചിരിക്കുന്നത്. സാധാരണ ഒന്നാംവിള പൊടിവിതയും രണ്ടാംവിള ഞാറ്റടി തയ്യാറാക്കി പറിച്ചു നടുകയുമാണ് ചെയ്യുക. ഞാറ്റടിവിത ആരംഭിച്ചിട്ടുണ്ട്. കൃഷിക്കായി നിലം ഉഴുതൊരുക്കി, ചില പാടങ്ങളിൽ ഇതിനോടകം നടീലും ആരംഭിച്ചു.

ജലക്ഷാമത്തിനുള്ള സാധ്യത കണക്കിലെടുത്ത് മൂപ്പ് കുറഞ്ഞ വിത്താണ് രണ്ടാം വിളക്ക് സാധാരണ ഉപയോഗിക്കാറ്. എന്നാൽ ഇത്തവണ അണക്കെട്ടുകളിൽ ആവശ്യത്തിന് ജലം ഉള്ളതിനാൽ ഈ ആശങ്കയില്ല. നവംബർ നാല് മുതൽ അണക്കെട്ടുകൾ കൃഷിക്കായി തുറക്കും. വടക്കഞ്ചേരി ആലത്തൂർ മേഖലകളിലാണ് ആദ്യം കൃഷിയിറക്കുക. ആദ്യം തുറക്കുന്നത് മംഗലം അണക്കെട്ടാണ്. മലമ്പുഴ ഇടതുകര - വലതുകര കനാലുകൾ, ചേരാമംഗലം, പോത്തുണ്ടി എന്നീ ഡാമുകൾ നവംബർ 15 ന് തുറക്കും. ഫെബ്രുവരി അവസാനം വരെ അണക്കെട്ടുകളിൽ നിന്നും വെള്ളം കൃഷിക്കായി ലഭ്യമാക്കും. ഏകദേശം 4000 ഹെക്‌ടറിലാണ് രണ്ടാം വിള കൃഷി ഇറക്കാൻ സാധ്യത. കഴിഞ്ഞ രണ്ടാം വിളക്ക് ജില്ലയിൽ 65000ലേറെ കർഷകർ സംഭരണത്തിനായി രജിസ്റ്റർ ചെയ്തിരുന്നു. 1.7 ലക്ഷം മെട്രിക് ടൺ നെല്ലാണ് അന്ന് സംഭരിച്ചത്. ഇത്തവണ വിളവ് കൂടുതൽ മെച്ചപ്പെടുമെന്നാണ് പ്രതീക്ഷിക്കുന്നത്.