എലപ്പുള്ളിയിലെ വയോധികയുടെ മരണത്തിൽ ദുരൂഹത; അന്വേഷിക്കുമെന്ന്‌ പൊലീസ്

ഇന്നലെ രാവിലെയാണ് തങ്കയെ വീടിനുള്ളിൽ മരിച്ച നിലയിൽ കണ്ടെത്തിയത്.

പാലക്കാട്: എലപ്പുള്ളി പാറ ചൊരയ്ക്കാപ്പള്ളത്ത്‌ തങ്കയെ (91) വീട്ടിനുള്ളിൽ ദുരൂഹ സാഹചര്യത്തിൽ മരിച്ച നിലയിൽ കണ്ടെത്തിയ സംഭവത്തിൽ തുടരന്വേഷണത്തിന്‌ നിർദേശം നൽകിയതായി ഡിവൈഎസ്‌പി പി.സി ഹരിദാസ്. ഇന്നലെ (13.04.2022) രാവിലെയാണ് തങ്കയെ വീടിനുള്ളിൽ മരിച്ച നിലയിൽ കണ്ടെത്തിയത്. തുടർന്ന് പോസ്റ്റ്‌മോർട്ടത്തിന് ശേഷം മൃതദേഹം സംസ്‌കരിച്ചിരുന്നു.

എന്നാൽ തങ്കയുടെ മരണത്തിൽ ദുരൂഹതയാരോപിച്ച് സഹോദരന്‍റെ മകനാണ് പൊലീസിനെ സമീപിക്കുന്നത്. ഈ പരാതിയെ തുടർന്നാണ് അസ്വാഭാവിക മരണത്തിന്‌ കേസെടുത്തത്. പോസ്റ്റ്‌മോർട്ടത്തിൽ ബലപ്രയോഗം നടന്നതിന്‍റെയോ അക്രമിക്കപ്പെട്ടതിന്‍റെയോ മുറിവുകൾ കണ്ടെത്തിയിട്ടില്ലെന്നാണ്‌ ഡോക്‌ടർമാർ നൽകുന്ന വിവരം.

കയറിൽ തൂങ്ങിയപ്പോഴുണ്ടായ മുറിപ്പാടുകളാണ് കഴുത്തിലുണ്ടായിരുന്നത്. തങ്ക തൂങ്ങി മരിച്ചതാകാമെന്നാണ് പ്രാഥമിക നിഗമനമെങ്കിലും വിശദമായ പോസ്റ്റ്‌മോർട്ടം റിപ്പോർട്ട് ലഭിച്ചാലേ കൂടുതൽ വ്യക്തത വരൂ എന്ന്‌ അന്വേഷണ ഉദ്യോഗസ്ഥൻ കസബ ഇൻസ്‌പെക്‌ടർ എൻ.എസ് രാജീവ് അറിയിച്ചു.

അതേസമയം തങ്കയുടെ മുഖത്തും മൂക്കിലും അടിയേറ്റ പാടുകളുണ്ടെന്നും പൊലീസ് പറയുന്നു. ബന്ധുക്കളുമായി വഴക്കിട്ട ശേഷം തൂങ്ങിമരിച്ചെന്നാണ്‌ അന്വേഷകസംഘത്തിന്‍റെ നിഗമനം. ഇന്നലെ സംശയം തോന്നിയ ബന്ധുക്കളെ വിളിച്ചുവരുത്തി പൊലീസ് ചോദ്യം ചെയ്‌ത് വിട്ടയച്ചിരുന്നു.