പാലക്കാട്:സംസ്ഥാനത്തിന്‍റെ ഉന്നത വിദ്യാഭ്യാസ സ്വപ്നങ്ങൾക്ക് നിറം പകർന്ന കഞ്ചിക്കോട് ഐഐടിയിലെ ആദ്യ ബാച്ച് വിദ്യാർഥികളുടെ ബിരുദദാന ചടങ്ങ് ശനിയാഴ്ച നടക്കും. 2015 ലാണ് കഞ്ചിക്കോട് ഐഐടി പ്രവർത്തനം ആരംഭിച്ചത്. ആദ്യ ബാച്ചിൽ പ്രവേശനം നേടിയ 104 വിദ്യാർഥികളിൽ 101 പേരും ബിരുദം നേടി. ഇതിൽ പന്ത്രണ്ട് പേർ മലയാളികളാണ്. ക്യാംപസ് പ്ലേസ്മെന്‍റിന് രജിസ്റ്റർ ചെയ്ത വിദ്യാർഥികളിൽ 83% പേർക്കും രാജ്യത്തെ ഏറ്റവും മികച്ച എഞ്ചിനീയറിങ്, ഐടി കമ്പനികളിൽ ഇതിനോടകം ജോലി ലഭിച്ചു കഴിഞ്ഞുവെന്ന് ഐഐടി ഡയറക്ടർ പ്രൊഫ. പി ബി സുനിൽ കുമാർ പറഞ്ഞു. ഇവർക്ക് ശരാശരി 7.75 ലക്ഷം രൂപ കമ്പനികൾ വാർഷിക വേതനം നൽകുമെന്നും അദ്ദേഹം പറഞ്ഞു.
കഞ്ചിക്കോട് ഐഐടിയിലെ ആദ്യ ബാച്ചിന്‍റെ ബിരുദദാന ചടങ്ങ് ശനിയാഴ്ച