ഭക്ഷണം കിട്ടിയില്ല; ഹോട്ടലിന്‍റെ ചില്ലുമേശ തകർത്ത യുവാവ് രക്തം വാർന്ന് മരിച്ചു

കടയടച്ചതിനാല്‍ ഭക്ഷണം നല്‍കാനാവില്ലെന്ന് ഹോട്ടൽ ജീവനക്കാര്‍ പറഞ്ഞതിനെ തുടർന്ന് മദ്യപിച്ചിരുന്ന യുവാവ് ഹോട്ടലിനുള്ളിലെ ചില്ലു മേശ കൈകൊണ്ട് ഇടിച്ചു തകര്‍ക്കുകയായിരുന്നു.

പാലക്കാട്:ഭക്ഷണശാലയിലെ ചില്ലു മേശ കൈ കൊണ്ട് തല്ലിത്തകർത്ത യുവാവ് ഞരമ്പ് മുറിഞ്ഞ് രക്തം വാർന്നു മരിച്ചു. ഇന്നലെ അർധരാത്രിയിൽ പാലക്കാട്‌ കൂട്ടുപാതയിലായിരുന്നു സംഭവം. കല്ലിങ്കൽ കളപ്പക്കാട് ശ്രീജിത്ത് (25) ആണ് മരിച്ചത്.

ശ്രീജിത്തും നാലു സുഹൃത്തുക്കളും അര്‍ധരാത്രിയോടെയാണ് കൂട്ടുപാതയിലെ ഹോട്ടലിലെത്തിയത്. യുവാക്കള്‍ മദ്യപിച്ചിരുന്നതായി പൊലീസ് അറിയിച്ചു. കടയടച്ചതിനാല്‍ ഭക്ഷണം നല്‍കാനാവില്ലെന്ന് ജീവനക്കാര്‍ പറഞ്ഞു. ഹോട്ടല്‍ ജീവനക്കാര്‍ക്കുള്ള ഭക്ഷണമെടുത്തു കഴിക്കാന്‍ യുവാക്കള്‍ ശ്രമിച്ചതോടെ തര്‍ക്കമായി.

ജീവനക്കാര്‍ ഷട്ടറിട്ടതോടെയാണ് യുവാക്കള്‍ പ്രകോപിതരായത്. അതിനിടെ ശ്രീജിത്ത് ഹോട്ടലിലെ ചില്ലു മേശ കൈകൊണ്ട് ഇടിച്ചു തകര്‍ത്തു. ഞരമ്പ് മുറിഞ്ഞ് രക്തം വാര്‍ന്ന യുവാവിനെ ജില്ല ആശുപത്രിയിലും പിന്നീട് സ്വകാര്യ ആശുപത്രിയിലും എത്തിച്ചെങ്കിലും ജീവന്‍ രക്ഷിക്കാനായില്ല. കസബ പൊലീസ് ഒപ്പമുണ്ടായിരുന്ന നാലു യുവാക്കളെയും കസ്റ്റഡിയിലെടുത്തു. അസ്വാഭാവിക മരണത്തിന് കേസെടുത്തതായി പൊലീസ് അറിയിച്ചു.