നെൽകർഷകരെ വീണ്ടും ചേർത്ത് പിടിച്ച് ബജറ്റ് 2020

കാർഷിക മേഖലയ്ക്കായി 2,000 കോടി രൂപ നീക്കിവച്ചത് കർഷകർക്ക് പ്രതീക്ഷ നൽകുന്നു

പാലക്കാട്: നെൽ കർഷകരെ ചേർത്തുപിടിക്കുന്ന ഒട്ടനവധി പദ്ധതികളാണ് ഇത്തവണത്തെ ബജറ്റിൽ ധനമന്ത്രി തോമസ് ഐസക്ക് പ്രഖ്യാപിച്ചിരിക്കുന്നത്. നെൽ കർഷകർക്ക് റോയൽറ്റി നൽകുന്നതിനായി 40 കോടി രൂപ മാറ്റിവച്ചു. നെൽകൃഷിയുടെ പാരിസ്ഥിതിക പ്രാധാന്യം കൂടി കണക്കിലെടുത്താണ് സർക്കാർ തീരുമാനമെന്നും ധനമന്ത്രി ബജറ്റ് പ്രസംഗത്തിൽ പറഞ്ഞു. കാർഷിക മേഖലയ്ക്കായി 2,000 കോടി രൂപ നീക്കിവച്ചതും കർഷകർക്ക് പ്രതീക്ഷ നൽകുന്നുണ്ട്.

നിലവിൽ ഹെക്ടറിന് 17,000 രൂപ ഉഴവുകൂലിയായും 1000 രൂപ വീതം ഉൽപാദന ബോണസായും 5,500 രൂപ സുസ്ഥിര വികസനത്തിനായും സർക്കാർ നെൽ കർഷകർക്ക് നൽകി വരുന്നുണ്ട്. ഇത് കൂടാതെ പാട്ട കൃഷിക്കാർക്ക് ഹെക്ടറിന് 30,000 രൂപ ധനസഹായവും നൽകുന്നു. മുൻകാല ബജറ്റുകളിൽ അവതരിപ്പിച്ച് നടപ്പിലാക്കിയ ഈ പദ്ധതികളിലൂടെ സംസ്ഥാനത്ത് നെൽകൃഷി ഇതിനോടകം വർദ്ധിച്ചതായി കാണാം. 2016 - 17 ൽ 1.71 ലക്ഷം ഹെക്ടറായിരുന്ന കൃഷി 2017-18ൽ 1.94 ലക്ഷം ഹെക്ടറായി വർദ്ധിച്ചു. 2020ൽ ഇത് 2.20 ലക്ഷം ഹെക്ടറായി വർദ്ധിക്കുമെന്നാണ് കൃഷി വകുപ്പിന്‍റെ പ്രതീക്ഷ. നെൽകർഷകർക്ക് ഇത്രയധികം പ്രോത്സാഹനം ലഭിച്ചിട്ടുള്ളത് ഈ സർക്കാരിന്‍റെ കാലത്താണെന്നും പുതിയ പ്രഖ്യാപനം കർഷകർക്ക് കൂടുതൽ കരുത്ത് പകരുമെന്നുമാണ് പാലക്കാട്ടെ കർഷകനായ സഹദേവന്‍റെ പ്രതികരണം.