മലപ്പുറം: കുട്ടികളുടെ ലോകം വര്‍ണങ്ങളുടേത് കൂടിയാണ്. കുഞ്ഞു മനസുകളിലേക്ക് നിറക്കൂട്ടുകളെ പരിചയപ്പെടുത്തുകയാണ് ഓമാനൂർ സ്വദേശിയായ പി.ടി യൂസുഫ്. കുട്ടികള്‍ക്ക് ചിത്രരചനയിലും സംഗീതത്തിലും സൗജന്യ പരിശീലനം നല്‍കി മാതൃകയാവുകയാണ് നാഷണൽ ഇന്നോവേറ്റീവ് അക്കാഡമി ചെയർമാൻ കൂടിയായ പി.ടി യൂസുഫ്.
ഓമാനൂരിൽ എല്ലാ ഞായറാഴ്‌ചയും നടക്കുന്ന പരിശീലന ക്ലാസിലേക്കായി നിരവധി കുട്ടികളാണ് എത്തി ചേരുന്നത്. കലയുടെ ലോകത്ത് കുട്ടികൾക്ക് ചവിട്ട് പടിയാവുകയാണ് ഇവിടെ യൂസുഫ്. രാവിലെ പത്ത് മണി മുതൽ ഒരു മണി വരെയാണ് ചിത്രരചന പരിശീലനം. ഉച്ചക്ക് ശേഷം കുട്ടികള്‍ക്കായി സംഗീത ക്ലാസും ഒരുക്കിയിട്ടുണ്ട്. ബക്കര്‍ വടകരയാണ് കുട്ടികളെ സംഗീതം പഠിപ്പിക്കുന്നത്.
കഴിവുള്ള കുട്ടികൾക്ക് അവസരമൊരുക്കുക മാത്രമാണ് താന്‍ ചെയ്യുന്നതെന്ന് യൂസുഫ് പറയുന്നു. ചായക്കൂട്ടുകളും, കളര്‍ പെന്‍സിലുകളും എന്തിന് പരിശീലനത്തിനാവശ്യമായ എല്ലാ വസ്‌തുക്കളും യൂസുഫ് തന്നെ കുട്ടികള്‍ക്ക് നല്‍കുന്നു. ഇതിനകം നിരവധി സ്‌കൂളുകളുടെ ചുമരുകളിലും അംഗനവാടികളിലും മനോഹരങ്ങളായ ചിത്രങ്ങള്‍ വരച്ചു ചേര്‍ത്തിട്ടുണ്ട് യൂസുഫ്. വരയെയും വരികളെയും ചേര്‍ത്തു പിടിക്കുന്ന യൂസുഫ് കുട്ടികള്‍ക്കും ഏറെ പ്രിയങ്കരനാണ്.
