മലപ്പുറം: പി.വി.അൻവർ എംഎൽഎയെ കാണാനില്ലെന്ന് യൂത്ത് കോൺഗ്രസ് പരാതി. യൂത്ത് കോൺഗ്രസ് നിലമ്പൂർ മുനിസിപ്പൽ കമ്മറ്റി പ്രസിഡന്‍റ് ഷംസുദ്ദീൻ ആണ് എംഎൽഎയെ കാണാനില്ലെന്ന് നിലമ്പൂർ പൊലീസിന് പരാതി നൽകിയത്. ഓണ്‍ലൈനിലൂടെയാണ് പരാതി നൽകിയത്.
നിലമ്പൂർ ടൗണിൽ ഉൾപ്പെടെ കാട്ടാന ശല്യം രൂക്ഷമാണ്. വടപുറം മുതൽ കെ.എൻ .ജി.റോഡ് തകരാറിലായതിനാൽ ബസുകൾ സർവീസ് നിറുത്താൻ പോകുന്നു. ഇത്തരം വിഷയങ്ങളിൽ അടിയന്തരമായി ഇടപെടേണ്ട എം.എൽ.എ എവിടെയാണെന്നു പോലും ജനങ്ങൾക്ക് അറിയില്ലെന്ന് ഷംസുദ്ദീൻ ആരോപിച്ചു. ഈ സാഹചര്യത്തിലാണ് താൻ പൊലീസിൽ പരാതി നൽകിയതെന്നും എം.എൽ.എ എവിടെയാണെന്ന് പറയാൻ അദ്ദേഹത്തിന്‍റെ പാർട്ടി തയ്യാറാകണമെന്നും ഷംസുദ്ദീൻ അവശ്യപ്പെട്ടു.