വീട് നിർമാണം തടഞ്ഞ അൻവറിനെതിരെ കേസെടുക്കണമെന്ന് വിവി പ്രകാശ്

നിലമ്പൂർ എംഎൽഎ രാജിവെക്കണമെന്നാവശ്യപ്പെട്ട് നാളെ കോൺഗ്രസിന്‍റെ നേതൃത്വത്തിൽ നിലമ്പൂരിൽ ജനകീയ മാർച്ച് നടത്തും. നേരത്തെ സി പി ഐയും അൻവറിനെതിരെ രംഗത്തെത്തിയിരുന്നു.

മലപ്പുറം: പിവി അൻവർ വിഷയത്തിൽ സിപിഎം നിലപാട് വ്യക്തമാക്കണമെന്ന് മലപ്പുറം ഡിസിസി പ്രസിഡന്‍റ് വിവി പ്രകാശ്. കോളനി നിവാസികൾക്ക് വീടുകൾ നിർമ്മിച്ചു നൽകുന്നത് തടഞ്ഞ പിവി അൻവർനെതിരെ കേസ് എടുക്കണമെന്നും അദ്ദേഹം മലപ്പുറത്ത് നടത്തിയ വാർത്താസമ്മേളനത്തിൽ വ്യക്തമാക്കി.

ഐടിഡിപി വാങ്ങിയ സ്ഥലത്ത് ഫെഡറല്‍ ബാങ്ക് രണ്ട് കോടി രൂപ മുടക്കി ചെമ്പൻകൊല്ലിയിൽ ചളികൽ കോളനിയിലെ 34 കുടുംബങ്ങള്‍ക്കാണ് വീടുകള്‍ നിര്‍മിച്ച് നല്‍കുന്നത്. ഈ വീടുകളുടെ നിർമാണം തടഞ്ഞ നടപടിക്കെതിരെ പട്ടികവർഗ പീഡന വിരുദ്ധ നിയമപ്രകാരം പൊലീസ് കേസെടുക്കണമെന്ന് വി വി പ്രകാശ് പറഞ്ഞു. പ്രളയത്തെ പോലും വ്യക്തിപരമായ സാമ്പത്തിക ലാഭത്തോടെയാണ് അൻവർ സമീപിക്കുന്നത്.

കലക്ടറെ ഭീഷണിപ്പെടുത്തിയത് സിപിഎം നേതൃത്വം അറിഞ്ഞുകൊണ്ടാണോ എന്നും ഇതിന് ഇടതുപക്ഷ നേതാക്കൾ മറുപടി പറയണമെന്നും വിവി പ്രകാശ് കൂട്ടിച്ചേർത്തു.

അൻവർ എംഎൽഎ സ്ഥാനം രാജിവെക്കണമെന്നാവശ്യപ്പെട്ട് നാളെ കോൺഗ്രസിന്‍റെ നേതൃത്വത്തിൽ നിലമ്പൂരിൽ ജനകീയ മാർച്ച് നടത്തും. നേരത്തെ സി പി ഐയും അൻവറിനെതിരെ രംഗത്തെത്തിയിരുന്നു.