മലപ്പുറം: ബിജെപി- ആര്‍എസ്‌എസ് വര്‍ഗീയ ശക്തികളുടെ വോട്ട് വേണ്ടന്ന് പറയാന്‍ യുഡിഎഫ് സ്ഥാനാര്‍ഥി വിവി പ്രകാശിനെ വെല്ലുവിളിച്ച് എല്‍ഡിഎഫ് സ്ഥാനാര്‍ഥി പിവി അന്‍വര്‍. തനിക്ക് ഒരു വര്‍ഗീയ ശക്തികളുടെ വോട്ടും വേണ്ട. യുഡിഎഫ് -ബിജെപി കൂട്ടു‌കെട്ട് നിലമ്പൂരിലും നടപ്പാക്കാന്‍ ശ്രമം നടക്കുന്നുണ്ട്. ഇത്തരം നീക്കങ്ങൾ വിലപ്പോകില്ലന്നും പിവി അന്‍വര്‍ പറഞ്ഞു. നാമനിര്‍ദേശ പത്രിക സമര്‍പ്പിച്ച ശേഷം എംഎല്‍എ ഓഫീസില്‍ വാര്‍ത്താ സമ്മേളനത്തില്‍ സംസാരിക്കുകയായിരുന്നു അദ്ദേഹം.
ആര്‍എസ്‌എസിന്‍റെ വോട്ട് വേണ്ടന്ന് പറയാന്‍ വിവി പ്രകാശിനെ വെല്ലുവിളിച്ച് പിവി അന്‍വര്‍ നിലമ്പൂര്‍ ഉള്‍പ്പെടെ സംസ്ഥാനത്തെ 37 മണ്ഡലങ്ങളില്‍ യുഡിഎഫ്- ബിജെപി അവിശുദ്ധ കൂട്ടു‌കെട്ട് ഉറപ്പിച്ചിട്ടുണ്ട്. എന്നാല്‍ മതേതരത്വത്തെ അട്ടിമറിക്കുന്ന ഈ നീക്കം ഒരിടത്തും വിജയിക്കില്ല. ജനകീയ സര്‍ക്കാറിന്‍റെ ശക്തി ജനങ്ങളാണ്. എല്ലാ അവിശുദ്ധ കൂട്ടുകെട്ടുകളും മറികടന്ന് നൂറിലേറെ സീറ്റുകള്‍ നേടി എല്‍ഡിഎഫ് ഭരണം നിലനിര്‍ത്തും. നിലമ്പൂരില്‍ വിജയം സുനിശ്ചിതമാണ്. മണ്ഡലത്തിലെ 600 കോടിയുടെ വികസനം കടലാസിലല്ല നടപ്പാക്കിയത്. മണ്ഡലത്തിലെ എല്ലാ ജനങ്ങളും വികസനങ്ങള്‍ക്ക് സാക്ഷിയാണ്. നിലമ്പൂര്‍ ബൈപ്പാസ് എങ്ങുമെത്തിയില്ലന്ന് പറയുന്നവര്‍ ബൈപ്പാസിലൂടെ ബൈക്കില്‍ സഞ്ചരിച്ചാല്‍ സത്യാവസ്ഥ മനസിലാവുമെന്നും അന്‍വര്‍ പറഞ്ഞു.
ബൈപ്പാസ് നിര്‍മാണം നീണ്ടതില്‍ ഏറെ ദുഖമുണ്ട്. പ്രവര്‍ത്തി നീളാന്‍ ശ്രമം നടത്തിയവരെ കുറിച്ച് പറയുന്നില്ലന്നും അന്‍വര്‍ കൂട്ടിചേര്‍ത്തു. സ്ത്രീകള്‍ക്കും യുവജനങ്ങല്‍ക്ക് തൊഴില്‍ ലഭ്യമാക്കാന്‍ മണ്ഡലത്തില്‍ പുതിയ സംരഭം യാഥാര്‍ഥ്യമാക്കും. മണ്ഡലത്തിലെ അടിസ്ഥാന വികസനങ്ങള്‍ക്ക് പ്രധാന പരിഗണന നല്‍കിയതിനാലാണ് വടപുറം പാലത്തിന് സമീപത്തെ ടൂറിസം പദ്ധതി പൂര്‍ത്തിയാവാതിരുന്നത്. യുഡിഎഫ് കൊണ്ടുവന്ന ടൂറിസം പദ്ധതിയില്‍ വന്‍ അഴിമതിയാണ് നടന്നത്. അശാസ്ത്രീയ നിര്‍മാണമാണ് കെഎസ്‌ആര്‍ടിസി ഷോപ്പിംഗ് കോംപ്ലക്‌സിന് തിരിച്ചടിയായത്. നിരവധി തവണ ലേലം നടത്തിയിട്ടും ആളില്ലാത്തത് കെട്ടിടം അശാസ്ത്രീയമായി നിര്‍മിച്ചതിനാലാണ്. സംസ്ഥാനത്തിന്‍റെ വിവിധ ഭാഗങ്ങളില്‍ കെഎസ്‌ആര്‍ടിക്ക് വേണ്ടി ഇത്തരം പദ്ധതികളാണ് യുഡിഎഫ് കൊണ്ടുവന്നത്. അന്ന് അഴിമതി നടത്തിയവരാണ് ഇന്ന് എല്‍ ഡി എഫിനെതിരെ തിരിയുന്നതെന്നും അന്‍വര്‍ പറഞ്ഞു.
