മലപ്പുറം:പുതുവര്‍ഷം പുലര്‍ന്ന അന്ന് രാവിലെ തന്നെ മോഷണം നടത്താനിറങ്ങിയ പ്രതിയെ ആണ് പൊലീസ് പിടികൂടിയത്. സംഭവത്തെക്കുറിച്ച് പൊലീസ് പറയുന്നത് ഇങ്ങനെ, തിങ്കളാഴ്‌ച രാവിലെ 8 30 ന് വഴിക്കടവ് പഞ്ചായത്തങ്ങാടിയിലെ നിലമ്പൂർ സഹകരണ അർബൻ ബാങ്കിന്‍റെ വഴിക്കടവ് ശാഖയുടെ എടിഎം കൗണ്ടര്‍ തകർപ്പെട്ട നിലയിൽ ബാങ്കിലെ ജീവനക്കാരില്‍ ഒരാളുടെ ശ്രദ്ധയില്‍പ്പെട്ടു. തുടർന്ന് വഴിക്കടവ് പോലീസിനെ വിവരം അറിയിച്ചു(Nilambur Urban Bank Theft Accused Arrested).
മലപ്പുറം ജില്ലാ പോലീസ് മേധാവി ശശിധരൻ ഐപിഎസിന്‍റെ നേതൃത്വത്തിൽ പ്രത്യേക അന്വേഷണ സംഘത്തിന് രൂപം നൽകി. നിലമ്പൂർ DySP സാജു കെ അബ്രാഹാം വഴിക്കടവ് ഇൻസ്പെക്ടർ മനോജ് പറയറ്റ എന്നിവരുടെ നേതൃത്വത്തിലുള്ള സംഘം പ്രത്യേക സ്ക്വാഡുകളായി തിരിഞ്ഞ് സമീപ പ്രദേശങ്ങളിൽ മോഷണ സ്വഭാവമുള്ള ആളുകളെ സംബന്ധിച്ച് അന്വേഷണം നടത്തി. എന്നാല്‍ കാര്യമായ വിവരങ്ങള്‍ ലഭിച്ചില്ല. തുടർന്ന് വഴിക്കടവ് അങ്ങാടിയിലെ അമ്പതോളം സിസിടിവി ക്യാമറ ദൃശ്യങ്ങള്‍ കേന്ദ്രീകരിച്ച് അന്വേഷണം നടത്തിയതില്‍ നിന്ന് പ്രതിയുടെ വ്യക്തമായ രൂപം അന്വേഷണം സംഘത്തിന് ലഭിച്ചു. ചെറിയ മഴു ഉപയോഗിച്ചാണ് പ്രതി എടിഎം പൊളിക്കാന്‍ ശ്രമിച്ചതെന്നും പൊലീസിന് വ്യക്തമായി.
പിന്നീട് പ്രതി വഴിക്കടവിൽ എത്താനുണ്ടായ സാഹചര്യത്തെ സംബന്ധിച്ച് അന്വേഷിക്കുന്നതിന് വഴിക്കടവിലേക്ക് ബസ്സ് സർവ്വീസ് നടത്തുന്ന KSRTC പ്രൈവറ്റ് ബസ്സുകളെ കേന്ദ്രീകരിച്ച് അന്വേഷണം നടത്തിയിൽ KSRTC മലപ്പുറം -ഊട്ടി സർവ്വീസ് നടത്തുന്ന ബസ്സിൽ പ്രതി തമിഴ്‌നാട്ടിലേക്ക് കടന്നതായി സൂചന ലഭിച്ചു. തുടര്‍ന്ന് അന്വേഷണ സംഘം തമിഴ്‌നാട്ടിലേക്ക് പുറപ്പെടുകയും, പിന്നീട് ഗൂഡല്ലൂർ പോലീസിന്‍റെ സഹായത്തോടെന ബസ് സറ്റാന്‍റ് കേന്ദ്രീകരിച്ച് CCTV പരിശോധിച്ചതിൽ പ്രതി ഗൂഡല്ലൂരിൽ എത്തിയെന്ന് അന്വേഷണ സംഘം ഉറപ്പിച്ചു.