മലപ്പുറം: മഞ്ചേരിയിൽ നഗരസഭ കൗൺസിലർ തലാപ്പിൽ അബ്‌ദുൽ ജലീലിനെ കൊലപ്പെടുത്തിയ സംഭവത്തിൽ രണ്ടുപേർ പിടിയിലായതായി സൂചന. ഇവരുടെ പേര് വിവരങ്ങൾ ഒന്നും പൊലീസ് ഇതുവരെ പുറത്ത് വിട്ടിട്ടില്ല. എന്നാൽ ജലീലിനെ ആക്രമിച്ച സംഘത്തിൽ മൂന്നു പേരായിരുന്നു ഉണ്ടായിരുന്നത്.
ഇതിൽ രണ്ടു പേരെ പൊലീസ് കസ്റ്റഡിയിലെടുത്തതായും ഒരാൾക്ക് വേണ്ടി അന്വേഷണം ഊർജിതമാക്കിയതായുമാണ് പുറത്തുവരുന്ന വിവരങ്ങൾ. ചൊവ്വാഴ്‌ച(29/03/2022) രാത്രിയിലാണ് മഞ്ചേരി 16-ാം വാർഡ് കൗൺസിലറും മുസ്ലിം ലീഗ് നേതാവുമായ തലാപ്പിൽ അബ്‌ദുൽ ജലീലിന് നേരെ പയ്യനാട് വെച്ച് അജ്ഞാത സംഘത്തിന്‍റെ ആക്രമണം ഉണ്ടായത്.
ഗുരുതര പരിക്കേറ്റ ഇദ്ദേഹത്തെ മഞ്ചേരിയിലെ സ്വകാര്യ ആശുപത്രിയിലും പിന്നീട് പെരിന്തൽമണ്ണയിലെ സ്വകാര്യ ആശുപത്രിയിലും എത്തിച്ചു. ഇവിടെ ചികിത്സയിൽ കഴിയുന്നതിനിടയിൽ ബുധനാഴ്‌ച രാത്രി ഏഴ് മണിയോടെ മരണം സംഭവിക്കുകയായിരുന്നു. പാർക്കിങ്ങുമായി ബന്ധപ്പെട്ട തർക്കമാണ് ആക്രമണത്തിലേക്ക് നയിച്ചതെന്നാണ് ലഭിക്കുന്ന വിവരം.