പാലത്തായി കേസിലെ പ്രതിക്ക് ജാമ്യം; പ്രതിഷേധവുമായി അധ്യാപകൻ

കോട്ടക്കല്‍ മലപ്പുറം റൂട്ടിലെ പുത്തൂർ ജങ്ഷനിലാണ് തെങ്ങിന് മുകളില്‍ കയറി അധ്യാപകൻ പ്രതിഷേധിച്ചത്

മലപ്പുറം:പാലത്തായി പീഡനക്കേസിലെ പ്രതിക്ക് ജാമ്യം നല്‍കിയതിനെതിരെ അധ്യാപകന്‍റെ ഒറ്റയാൾ പ്രതിഷേധം. കോട്ടക്കല്‍ മലപ്പുറം റൂട്ടിലെ പുത്തൂർ ജങ്ഷനിലാണ് തെങ്ങിന് മുകളില്‍ കയറി നിലമ്പൂർ സ്വദേശിയായ അധ്യാപകൻ പ്രതിഷേധം നടത്തിയത്. ബിജെപി നേതാവും അധ്യാപകനുമായ പത്മരാജനെ സംരക്ഷിക്കുന്ന നിലപാടാണ് സർക്കാരിന്‍റേതെന്ന് ഒറ്റയാൾ സമരം നടത്തുന്ന അബ്ദുൾ കലാം ആരോപിച്ചു. പോക്സോ ചുമത്താതെ നിസാര വകുപ്പുകൾ മാത്രം ചുമത്തിയത് കൊണ്ടാണ് പ്രതിക്ക് ജാമ്യം ലഭിച്ചതെന്നും അബ്ദുള്‍ കലാം പറഞ്ഞു.

മന്ത്രി കെ.കെ ശൈലജയുടെ മണ്ഡലത്തില്‍ നടന്ന പീഡനത്തില്‍ പ്രതികളെ സംരക്ഷിക്കുന്ന സർക്കാർ നിലപാടിനെതിരെ ശക്തമായ പ്രതിഷേധമാണ് ഉയരുന്നത്. കൊവിഡ് പശ്ചാത്തലത്തില്‍ സമൂഹ മാധ്യമങ്ങളില്‍ അടക്കം പ്രതിഷേധം ശക്തമാകുന്നതിനിടെയാണ് വേറിട്ട സമരവുമായി അബ്ദുൾ കലാം രംഗത്തെത്തിയത്.