മലപ്പുറം:ഒന്ന് പുറത്തിറങ്ങി നടക്കണമെങ്കില്‍ ഹെല്‍മറ്റ് വെക്കേണ്ട സ്ഥിതിയാണ് പെരിന്തൽമണ്ണയ്ക്കടുത്ത് ഒലിങ്കര ഗ്രാമത്തില്‍. പ്രദേശത്ത് കൂടുകൂട്ടിയ കാക്കകളാണ് ഈ സാഹചര്യത്തിന് കാരണം. കാക്കകളെ ഭയന്ന്, കൈയില്‍ വടിപോലുമില്ലാതെ നടക്കാന്‍ ഭയക്കുകയാണ് പ്രദേശവാസികള്‍.
കാക്കകളെക്കൊണ്ട് പൊറുതിമുട്ടി പെരിന്തൽമണ്ണ ഒലിങ്കര പ്രദേശം
ഒലിങ്കര സ്വദേശി അമ്പലപ്പറമ്പിൽ അബ്ബാസിന്‍റെ വീടുപണി നടക്കുന്നിടത്താണ് കാക്കകളുടെ ശല്യം ആരംഭിക്കുന്നത്. മൂന്ന് മാസം മുൻപ് വീടുപണിയ്ക്ക്‌ എത്തിയ പണിക്കാര്‍ക്കാണ് ആദ്യം കാക്കയുടെ കൊത്തുകിട്ടിയത്. വീടുപണിപോലും മുടങ്ങിയ സാഹചര്യത്തില്‍ പണിക്കാരിലൊരാൾ കാക്കയുടെ കൂട് തള്ളിത്താഴെയിട്ടു. പിന്നീടങ്ങോട്ട് കാക്കകളുടെ ആക്രമണത്തിന്‍റെ ശക്തി കൂടുകയായിരുന്നു.