മലപ്പുറം: നിലമ്പൂരിലെ ആദിവാസി കോളനികളില്‍ ദീര്‍ഘദൂര വൈഫൈ പദ്ധതിക്ക് (ലോങ് ഡിസ്റ്റന്‍സ് വൈഫൈ പ്രൊജക്റ്റ്) തുടക്കമായി. ഓണ്‍ലൈന്‍ പഠനം, ടെലിമെഡിസിന്‍ എന്നിവ ഒരുക്കുന്നതിനായി ജന്‍ ശിക്ഷണ്‍ സന്‍സ്ഥാന്‍, നബാര്‍ഡിന്‍റെ സഹായത്തോടെ നടപ്പിലാക്കിയ പദ്ധതി ചാലിയാര്‍ പാലക്കയം കോളനിയില്‍ പി.വി. അബ്‌ദുല്‍ വഹാബ് എം.പി ഉദ്ഘാടനം ചെയ്തു. പൊതുവിദ്യാഭ്യാസ വകുപ്പിന് കീഴിലുള്ള കൈറ്റ് ലഭ്യമാക്കിയ ഇന്‍റര്‍നെറ്റ് കണക്ഷന് പുറമെയാണിത്.
ആദിവാസി മേഖലയിലും ഇനി ഇന്‍റര്‍നെറ്റ് സംവിധാനം
വേഗതയേറിയതും തടസമില്ലാത്തതുമായ ഇന്‍റര്‍നെറ്റ് സൗകര്യം ലഭ്യമാക്കുക എന്ന ലക്ഷ്യവുമായി നടപ്പിലാക്കുന്ന പദ്ധതി ചാലിയാര്‍ ഗ്രാമപഞ്ചായത്തിലെ വനത്തിനുള്ളില്‍ സ്ഥിതിചെയ്യുന്ന പാലക്കയം, വെറ്റിലക്കൊല്ലി, അമ്പുമല കോളനികളിലാണ് ആദ്യ ഘട്ടത്തില്‍ നടപ്പിലാക്കുന്നത്. കോളനിക്കാര്‍ക്കുള്ള ടെലിമെഡിസിന്‍ സേവനത്തിന് പുറമെ 145 വിദ്യാര്‍ഥികള്‍ക്ക് ഓണ്‍ലൈന്‍ പഠനത്തിനും പദ്ധതി പ്രയോജനം ചെയ്യും. നിലമ്പൂര്‍ ഇന്ദിരാഗാന്ധി മെമ്മോറിയല്‍ മോഡല്‍ റസിഡന്‍ഷ്യല്‍ ഗവ. സ്‌കൂളില്‍ സ്ഥാപിച്ച സ്റ്റേഷനില്‍ നിന്നും അഞ്ച് ചെറിയ ടവറുകള്‍ സ്ഥാപിച്ച് 100 എം.ബി.പി.എസ് വേഗതയിലാണ് ഈ മേഖലയിൽ ഇന്‍റര്‍നെറ്റ് സേവനം ലഭ്യമാക്കുക.
ഇനി കാടിറങ്ങാതെ പഠനവും ആരോഗ്യസേവനവും
വൈദ്യുതിയില്ലാത്തയിടങ്ങളില്‍ സോളാര്‍ സംവിധാനത്തിലാകും ഇവ പ്രവര്‍ത്തിപ്പിക്കുക. ഇന്‍റര്‍നെറ്റ് സേവനം ലഭ്യമാകുന്നതോടെ കോളനിക്കാര്‍ക്ക് കാടിറങ്ങാതെ തന്നെ ടെലിമെഡിസിന്‍ സംവിധാനത്തിലൂടെ ഡോക്‌ടര്‍മാരുടെ സേവനം ലഭ്യമാക്കാനാകും. ജില്ലാ കലക്‌ടര്‍ ഉള്‍പ്പെടെ ഉദ്യോഗസ്ഥരുമായി കോളനിക്കാര്‍ക്ക് വീഡിയോ കോണ്‍ഫറന്‍സിലൂടെ പരാതികള്‍ ബോധിപ്പിക്കാനും സംവിധാനമൊരുങ്ങും. ജന്‍ ശിക്ഷണ്‍ സന്‍സ്ഥാന്‍ ടെക്നോളജി പാര്‍ട്‌ണര്‍ ഫോര്‍ എസ് വയനാടാണ് പദ്ധതിക്കാവശ്യമായ സാങ്കേതിക സഹായം ലഭ്യമാക്കിയത്. ബിഎസ്എന്‍എല്ലിലെ ഉന്നത ഉദ്യോഗസ്ഥരടങ്ങുന്ന സാങ്കേതിക സമിതി പദ്ധതി പരിശോധിച്ച് പ്രവര്‍ത്തനം വിലയിരുത്തി അംഗീകാരം നല്‍കിയിട്ടുണ്ട്.