മലപ്പുറം: കൊവിഡ് 19 എന്ന മഹാമാരിയെ ചെറുക്കാന്‍ പൊതു സമൂഹം ഉണര്‍ന്ന്‌ പ്രവര്‍ത്തിക്കണമെന്ന് ഉന്നത വിദ്യാഭ്യാസ വകുപ്പ്‌ മന്ത്രി ഡോ കെടി ജലീല്‍. വൈറസിന്‍റെ സമൂഹ വ്യാപനം തടയാന്‍ ജില്ലയില്‍ പഴുതടച്ചുള്ള ക്രമീകരണങ്ങളാണ് നടത്തുന്നത്. തദ്ദേശസ്വയംഭരണ സ്ഥാപനങ്ങള്‍ക്ക് ഇതില്‍ വലിയ പങ്കു വഹിക്കാനുണ്ടെന്ന് തദ്ദേശ സ്വയംഭരണ സ്ഥാപനങ്ങളിലെ അധ്യക്ഷന്മാരുമായും സെക്രട്ടറിമാരുമായും നടത്തിയ വീഡിയോ കോണ്‍ഫറന്‍സില്‍ അദ്ദേഹം പറഞ്ഞു. ആളുകള്‍ കൂട്ടം കൂടുന്നത് കര്‍ശനമായി തടയുന്നതിലൂടെ മാത്രമെ ഈ പ്രതിസന്ധി ഘട്ടത്തെ മറികടക്കാനാവൂ. ജില്ലാ ഭരണകൂടവും ആരോഗ്യ വകുപ്പും പൊലീസും മറ്റു വകുപ്പുകളും സംയുക്തമായി നടത്തിവരുന്ന പ്രതിരോധ പ്രവര്‍ത്തനങ്ങള്‍ തദ്ദേശ ഭരണസ്ഥാപനങ്ങളിലൂടെ പൂര്‍ണതയിലെത്തിക്കാനാണ് മുഖ്യമന്ത്രിയുടെ നേതൃത്വത്തില്‍ സംസ്ഥാന സര്‍ക്കാര്‍ ശ്രമിക്കുന്നത്.
യുദ്ധ ഘട്ടത്തില്‍ ഉണര്‍ന്ന്‌ പ്രവര്‍ത്തിക്കണം: മന്ത്രി ഡോ കെടി ജലീല്‍