കൊണ്ടോട്ടിയില്‍ ബസും ലോറിയും കൂട്ടിയിടിച്ച് അപകടം; യുവതി മരിച്ചു, ഇരുപതോളം പേര്‍ക്ക് പരിക്ക്

പരിക്കേറ്റവര്‍ ജില്ലയിലെ രണ്ട് സ്വകാര്യ ആശുപത്രികളില്‍ ചികിത്സയിയലാണ്

മലപ്പുറം:കൊണ്ടോട്ടിയില്‍ ബസും ലോറിയും കൂട്ടിയിടിച്ചുണ്ടായ അപകടത്തില്‍ ഒരു യുവതി മരിച്ചു. ഗുരുതര പരുക്കുകളോടെ ആശുപത്രിയിലെത്തിച്ച, മൊറയൂർ നരവത്ത് സ്വദേശിനി വിജി ആണ് മരിച്ചത്. ഇരുപതോളം പേര്‍ക്ക് പരിക്കേറ്റു.

പരിക്കേറ്റയാളുകള്‍ രണ്ട് സ്വകാര്യ ആശുപത്രികളില്‍ ചികിത്സയിലാണ്. ബുധനാഴ്‌ച രാവിലെ ആറുമണിയോടെ കൊണ്ടോട്ടി ബൈപ്പാസിന് സമീപമാണ് സംഭവം. മഞ്ചേരിയില്‍ നിന്ന് കോഴിക്കോട്ടേക്ക് പോവുകയായിരുന്ന ഐവിന്‍ ബസാണ് അപകടത്തില്‍പ്പെട്ടത്.

അമിതവേഗതയില്‍ വന്ന ടോറസ് ലോറി, ബസില്‍ ഇടിക്കുകയായിരുന്നു. ഇടിയുടെ ആഘാതത്തില്‍ ബസ് മറിഞ്ഞു. ഓടിയെത്തിയ നാട്ടുകാരും ഡ്രൈവർമാരും കച്ചവടക്കാരുമാണ് രക്ഷാപ്രവർത്തനം നടത്തിയത്. ബസിനുള്ളിൽ കുടുങ്ങിയവരെ ഉടൻ പുറത്തെടുത്ത് ആശുപത്രിയിൽ എത്തിച്ചു. അപകടത്തില്‍ സമീപത്തെ വൈദ്യുതി തൂൺ തകർന്നു.