മലപ്പുറം: അടുത്ത വർഷത്തോടെ മൂന്ന് ലക്ഷം കോടി രൂപയുടെ ഇടപാടുകളുമായി ഒന്നാമതെത്താനാണ് കേരള ബാങ്കിന്‍റെ ലക്ഷ്യമെന്ന് മന്ത്രി കടകംപള്ളി സുരേന്ദ്രൻ. സംസ്ഥാനത്തിന്‍റെ സമഗ്രപുരോഗതിക്കും സഹകരണ മേഖലയുടെ മുന്നേറ്റത്തിനും കേരള ബാങ്ക് സഹായിക്കും. സംസ്ഥാനത്തെ പ്രതികൂല കാലാവസ്ഥയെ കേരള ബാങ്ക് അതിജീവിച്ചു. മലപ്പുറം ജില്ലയിലെ പ്രശ്‌നങ്ങൾ വൈകാതെ തന്നെ പരിഹരിക്കപ്പെടുമെന്ന് തനിക്ക് ശുഭപ്രതീക്ഷയുണ്ടെന്നും മന്ത്രി പറഞ്ഞു. തിരൂരങ്ങാടി സർവീസ് സഹകരണ ബാങ്ക് ആസ്ഥാന മന്ദിരമായ തിരൂരങ്ങാടി സഹകരണ ഭവൻ ഉദ്ഘാടനവും പ്ലാറ്റിനം ജൂബിലി ആഘോഷ പ്രഖ്യാപനവും നിർവഹിക്കുകയായിരുന്നു അദ്ദേഹം.
പ്രതികൂലാവസ്ഥയെ കേരളബാങ്ക് അതിജീവിച്ചെന്ന് മന്ത്രി കടകംപള്ളി വിദേശ നിക്ഷേപത്തിന്‍റെ 25 ശതമാനമെങ്കിലും സഹകരണ ബാങ്കുകളിലേക്ക് കൊണ്ടുവരാനായാൽ സംസ്ഥാനത്തിന്‍റെ പൊതുതാൽപര്യങ്ങൾക്കായി വിനിയോഗിക്കാനാകും. പുതുതലമുറ - ദേശസാൽകൃത ബാങ്കുകൾ ജനങ്ങളെ കൊള്ളയടിക്കുന്ന ഈ ഘട്ടത്തിൽ കേരള ബാങ്കിന് വളരെയേറെ പ്രസക്തിയുണ്ട്. വട്ടി പലിശക്കാരെ പൂർണമായും ഒഴിവാക്കാൻ ചെറിയ തുക പോലും വായ്‌പയായി നൽകാൻ സഹകരണ ബാങ്കുകളിൽ സൗകര്യമൊരുക്കണം. പ്രകൃതിക്ഷോഭത്തിൽ നാശമുണ്ടായ നിലമ്പൂരിൽ 67 വീടുകൾ കെയർ ഹോം പദ്ധതിയിൽ ഉൾപ്പെടുത്തി നിർമ്മിച്ച് നൽകുമെന്നും സ്ഥലം ലഭ്യമാക്കാനുള്ള സർക്കാർ നടപടികൾ അന്തിമ ഘട്ടത്തിലാണെന്നും മന്ത്രി കൂട്ടിച്ചേർത്തു.
പി.കെ അബ്‌ദുറബ്ബ് എംഎൽഎ അധ്യക്ഷനായി. നഹാ സാഹിബ് ഓഡിറ്റോറിയം പി.കെ കുഞ്ഞാലിക്കുട്ടി എം.പി ഉദ്ഘാടനം ചെയ്തു. മെയിൻ ബ്രാഞ്ച് ഉദ്ഘാടനവും സഹകാരികളെ ആദരിക്കലും ഇ.ടി. മുഹമ്മദ് ബഷീർ എം.പി നിർവഹിച്ചു.
