നിലമ്പൂരിൽ കനത്ത മഴ; മതിൽമൂല കോളനിയിൽ ഇക്കുറിയും വെള്ളം കയറി

കാഞ്ഞിരപ്പുഴയിൽ ജലനിരപ്പ് ഉയർന്ന് കോളനിയിലേക്ക് വെള്ളം കയറിയതിനെ തുടർന്ന് കോളനി വാസികളിൽ മിക്കവരും ബന്ധുവീടുകളിലേക്ക് മാറിയിരിക്കുകയാണ്.

മലപ്പുറം: ജില്ലയിലെ നിലമ്പൂർ മേഖലയിൽ കനത്ത മഴയെത്തുടർന്ന് കാഞ്ഞിരപ്പുഴയിൽ ജലനിരപ്പുയർന്നു. പുഴ കരകവിഞ്ഞതോടെ മതിൽമൂല കോളനിയിൽ വെള്ളം കയറിയിട്ടുണ്ട്.

2018, 2019 പ്രളയങ്ങളിൽ ഏറെ നാശം നേരിട്ട ചാലിയാർ പഞ്ചായത്തിലെ മതിൽമൂല കോളനിയിലെ വീടുകളിലാണ് ഇക്കുറിയും വെള്ളം കയറിയിരിക്കുന്നത്. ബുധനാഴ്‌ച വൈകുന്നേരം ആറ് മണിയോടെയാണ് കാഞ്ഞിരപ്പുഴയിൽ ജലനിരപ്പ് ഉയർന്നതും കോളനിയിൽ വെള്ളം കയറിയതും.

ഇവിടെ നിലവിൽ നാമമാത്രമായ കുടുംബങ്ങളാണുള്ളത്. വെള്ളം കയറിയതോടെ പലരും ബന്ധുവീടുകളിലേക്കും മറ്റും മാറി താമസിച്ചിരിക്കുകയാണ്. ഏത് സമയത്തും കാഞ്ഞിരപ്പുഴയിൽ ജലനിരപ്പ് ഉയരാൻ സാധ്യതയുള്ളതിനാൽ ഈ ഭാഗത്തെ കുടുംബങ്ങൾ കടുത്ത ജാഗ്രതയിലാണ്.