മലപ്പുറം: നിലമ്പൂർ ഒ.സി.കെ ഓഡിറ്റോറിയത്തിൽ നടക്കുന്ന വനം അദാലത്ത് മന്ത്രി കെ രാജു ഉദ്ഘാടനം ചെയ്തു. വനം മേഖലയുമായി ബന്ധപ്പെട്ട പരാതികൾക്ക് വേഗം തീർപ്പ് കൽപ്പിക്കാനാണ് അദാലത്തുകൾ നടത്തുന്നതെന്ന് മന്ത്രി പറഞ്ഞു. നിലവിലെ വനനിയമങ്ങൾ, ചട്ടങ്ങൾ, കോടതി വിധി എന്നിവയുടെ അടിസ്ഥാനത്തിലായിരിക്കും പരിഹാരം കണ്ടെത്തുക.
വനം അദാലത്ത് മന്ത്രി കെ രാജു ഉദ്ഘാടനം ചെയ്തു;പരാതികള്‍ പരിഹരിച്ചതായി മന്ത്രി ഭൂമി സംബന്ധമായ കാര്യങ്ങൾ ഒഴികെ ബാക്കിയെല്ലാ പരാതികൾക്കും പരിഹാരം കണ്ടെത്തിയിട്ടുണ്ടെന്നും മന്ത്രി പറഞ്ഞു. ഈ സർക്കാർ വന്ന ശേഷം കാട്ടാനകൾ ഉൾപ്പെടെയുള്ള വന്യജീവികളുടെ ആക്രമണത്തിൽ മരിക്കുന്നവരുടെ ആശ്രിതർക്ക് നൽകിയിരുന്ന അഞ്ച് ലക്ഷം രൂപ 10 ലക്ഷമാക്കി ഉയര്‍ത്തിയിട്ടുണ്ട്. കൂടാതെ വനത്തിലുളളിൽ പാമ്പുകടിയേറ്റ് മരിച്ചാല്‍ മൂന്ന് ലക്ഷവും, പുറത്താണെങ്കില്‍ രണ്ട് ലക്ഷവും ആശ്രിതർക്ക് നല്‍കും.
കേന്ദ്രാനുമതി ലഭിച്ച 10 ഹെക്ടർ വനഭൂമി റവന്യൂ വകുപ്പിന് കൈമാറിയിട്ടുണ്ട്. ബാക്കി വരുന്ന 111.58 ഹെക്ടർ വന ഭൂമി കൂടി റവന്യൂ വകുപ്പിന് കൈമാറും. ഇത് ആദിവാസി കുടുംബങ്ങൾക്ക് കൈമാറുമെന്നും മന്ത്രി പറഞ്ഞു. വനം വകുപ്പ് ഓഫീസുകളിൽ എത്തുന്ന പരാതികളിൽ കാലതാമസം കൂടാതെ നടപടി സ്വീകരിക്കാൻ ഉദ്യോഗസ്ഥർക്ക് മന്ത്രി നിർദ്ദേശം നൽകി. സംസ്ഥാനത്തെ പന്ത്രണ്ടാമത് വനം അദാലത്താണ് നിലമ്പൂരിൽ നടക്കുന്നത്. 220 അപേക്ഷകള്‍ ലഭിച്ചു. ഇതിൽ കാട്ടാന ആക്രമണത്തിൽ കൊല്ലപ്പെട്ട ജാർഖണ്ഡ് സ്വദേശിയുടെ വിധവയ്ക്ക് നഷ്ടപരിഹാരമായ 10 ലക്ഷം രൂപയും മന്ത്രി കൈമാറി. വന്യമൃഗശല്യം മൂലം കൃഷി നശിച്ച കർഷകർക്കായി 34 ലക്ഷം രൂപയും വിതരണം ചെയതു.
പി.വി അൻവർ എം.എൽ.എ അധ്യക്ഷനായി. പി.വി.അബ്ദുൾ വഹാബ് എം.പി മുഖ്യ പ്രഭാഷണം നടത്തി. ജില്ലാ കലക്ടർ ജാഫർ മാലിക്, വനം പ്രിൻസിപ്പൽ സി.സി.എഫ് ദേവേന്ദ്രകുമാർ, നിലമ്പൂർ നഗരസഭാ ചെയർപേഴ്സൺ പത്മിനി ഗോപിനാഥ്, ബ്ലോക്ക് പഞ്ചായത്ത് പ്രസിഡന്‍റ് പി.പി സുഗതൻ, നഗരസഭാ കൗൺസിലർ ഗീരിഷ് മോളൂർമത്തിൽ, പഞ്ചായത്ത് പ്രസിഡൻറുമാർ, വനപാലകർ എന്നിവർ പങ്കെടുത്തു.
