ഔദ്യോഗിക പ്രഖ്യാപനം വരുംമുമ്പെ തവനൂരിൽ റോഡ് ഷോയുമായി ഫിറോസ് കുന്നംപറമ്പിൽ

പാർട്ടിക്കുള്ളിലെ അസ്വാരസ്യങ്ങളെ തുടർന്നാണ് തവനൂരിലെ സ്ഥാനാർഥി പ്രഖ്യാപനം കോൺഗ്രസ് മാറ്റി വെച്ചത്

മലപ്പുറം: തവനൂരിൽ ഔദ്യോഗിക സ്ഥാനാർഥി പ്രഖ്യാപനം വരുംമുമ്പെ റോഡ് ഷോയുമായി ചാരിറ്റി പ്രവർത്തനങ്ങളിലൂടെ ശ്രദ്ധ നേടിയ ഫിറോസ് കുന്നുംപറമ്പിൽ. എടപ്പാൾ വട്ടംകുളത്ത് നിന്നാരംഭിച്ച യാത്രയിൽ യൂത്ത് കോൺഗ്രസ്, യൂത്ത് ലീഗ് പ്രവർത്തകർ അണി നിരന്നു. ചൊവ്വാഴ്ച രാത്രിയോടെയാണ് ഔദ്യോഗിക പ്രഖ്യാപനം വന്നത്. തുറന്ന ജീപ്പിലാണ് 'നിയുക്ത' സ്ഥാനാർഥിയെ ആനയിച്ചത്. ഫിറോസിന്‍റെ സ്ഥാനാർഥിത്വത്തിനെതിരെ നേരത്തെ യൂത്ത് കോൺഗ്രസ് പ്രവർത്തകർ രംഗത്തെത്തിയിരുന്നു.

പാർട്ടിക്കുള്ളിലെ അസ്വാരസ്യങ്ങളെ തുടർന്നാണ് തവനൂരിലെ സ്ഥാനാർഥി പ്രഖ്യാപനം കോൺഗ്രസിന് മാറ്റി വെച്ചത്. പ്രശ്‌നങ്ങൾ ഉടലെടുത്തതോടെ മത്സരിക്കാനില്ലെന്ന് ഫിറോസ് അറിയിച്ചിരുന്നു. എന്നാൽ നേതാക്കൾ ആവശ്യപ്പെട്ടത് കൊണ്ടാണ് പാതിമനസോടെ മത്സരിക്കാമെന്ന് തീരുമാനിച്ചതെന്ന് ഫിറോസ് പറഞ്ഞു. ആദ്യ ഘട്ട സ്ഥാനാർഥി പട്ടികയിൽ തന്‍റെ പേര് കണ്ടില്ല. ആ സീറ്റിനായി പലരും കടിപിടി കൂടുന്ന കാര്യം പിന്നീടാണ് അറിഞ്ഞത്. അതുകൊണ്ടാണ് തവനൂരിൽ മത്സരിക്കാനില്ലെന്ന് ആദ്യം പറഞ്ഞിരുന്നതെന്നും ഫിറോസ് കുന്നുംപറമ്പിൽ പറഞ്ഞു.