കേരള പ്രൈവറ്റ് കോളജ് ടീച്ചേഴ്‌സ്‌ അസോസിയേഷൻ ധർണ നടത്തി

സംസ്ഥാന ഉന്നത വിദ്യാഭ്യാസ വകുപ്പിൻ്റെ നടപടികളിൽ പ്രതിഷേധിച്ചായിരുന്നു ധർണ

മലപ്പുറം:സംസ്ഥാന ഉന്നത വിദ്യാഭ്യാസ വകുപ്പിൻ്റെ നടപടികളിൽ പ്രതിഷേധിച്ച് കാലിക്കറ്റ് സർവകലാശാല ഭരണകാര്യാലയത്തിന് മുന്നിൽ കേരള പ്രൈവറ്റ് കോളജ് ടീച്ചേഴ്‌സ്‌ അസോസിയേഷൻ പ്രതിനിധികൾ ധർണ നടത്തി. മലപ്പുറം ഡി സി സി പ്രസിഡൻ്റ് അഡ്വ.വി .വി പ്രകാശ് ഉദ്ഘാടനം ചെയ്തു. ഒഴിഞ്ഞു കിടക്കുന്ന മൂവായിരത്തോളം തസ്തികകളിൽ നിയമനം നടത്തണമെന്നും സിംഗിൾ ഫാക്കൽറ്റി ഉൾപ്പെടെ 16 മണിക്കൂറിൽ കുറവുള്ള തസ്തികകൾ നിലനിർത്തി കാലങ്ങളായി തുടരുന്ന പ്രവർത്തന സമയം ക്രമീകരിക്കണമെന്നും കോളജ് അധ്യാപകർ ആവശ്യപ്പെട്ടു.

സംസ്ഥാന പ്രസിഡൻ്റ് ഡോ.കെ ജോബി തോമസ് മുഖ്യ പ്രഭാഷണം നടത്തി. സംസ്ഥാന ട്രഷറർ ഡോ. ടി മുഹമ്മദലി അധ്യക്ഷത വഹിച്ചു. കാലിക്കറ്റ് യൂണിവേഴ്‌സിറ്റി ടീച്ചേഴ്‌സ് അസോസിയേഷൻ പ്രതിനിധി ഡോ. സെബാസ്റ്റ്യൻ, യൂണിവേഴ്‌സിറ്റി സ്റ്റാഫ് ഓർഗനൈസേഷൻ ഭാരവാഹി കെ .എഫ് മനോജ്, ഗവ.കോളജ് ടീച്ചേഴ്‌സ്‌ ഓർഗനൈസേഷൻ നേതാവ് ഡോ.ജാഫർ സാദിഖ്, മേഖല പ്രസിഡന്‍റ്‌ ഡോ.ടി കെ ഉമ്മർ ഫാറൂഖ് എന്നിവർ സംസാരിച്ചു.