മലപ്പുറം: ജീവൻരക്ഷാ മരുന്നുകളുമായി പറന്ന് അഗ്നിരക്ഷാ സേനയും സിവിൽ ഡിഫൻസും. മാമ്പാട് പുളിക്കലോടിയിൽ താമസിക്കുന്ന വെട്ടോലിൽ വീട്ടിൽ അലക്സാണ്ടറിനുവേണ്ടി അഗ്നിരക്ഷാ സേനയും സിവിൽ ഡിഫൻസും പറന്നത് ശരവേഗതയിൽ. അർബുദ രോഗബാധിതനായ ഇദ്ദേഹത്തിന് അത്യാവശ്യമായി ആലുവയിൽനിന്ന് മരുന്ന് ലഭിക്കണം. ഈ കാര്യം രാവിലെ ഫയർ ആന്‍ഡ് റെസ്ക്യു സിവിൽ ഡിഫൻസിന്‍റെ മലപ്പുറം ഡിവിഷന്‍ വാർഡൻ അനൂപ് വെള്ളിലയേയും നിലമ്പൂർ ഫയർ സ്റ്റേഷൻ ഓഫീസർ എം.അബ്ദുൽ ഗഫൂറിനെയും അറിയിച്ചു.
തുടർന്ന് ആലുവ അഗ്നി രക്ഷാ നിലയത്തിൽ നിന്നും മരുന്ന് തൃശ്ശൂരിലെത്തിച്ചു. പിന്നീട് തിരുവാലി അഗ്നി രക്ഷാ നിലയത്തിലെ ലീഡിങ് ഫയർമാൻ സുബ്രമണ്യൻ, സിവിൽ ഡിഫൻസ് ഡെപ്യൂട്ടി ഡിവിഷണൽ വാർഡൻ ബിബിൻ പോൾ, എന്നിവർ ചേർന്ന് മരുന്നുകൾ മകൻ സാം അലക്സാണ്ടറിന് കൈമാറി.