വിവാദം മുസ്ലിം ലീഗ് ഇടതുപക്ഷത്തേക്ക് പോകാൻ തയ്യാറെടുക്കുന്നതിന്‍റെ സൂചന : കെ.സുരേന്ദ്രൻ

കുഞ്ഞാലിക്കുട്ടി വിഭാഗമോ, പാണക്കാട് കുടുംബമോ അധികം വൈകാതെ ഇടതുമുന്നണിയിലേക്കുപോകുമെന്ന് കെ.സുരേന്ദ്രൻ

മലപ്പുറം: ഇടതുപക്ഷവും മുസ്ലിം ലീഗും തമ്മിലുള്ള അന്തർധാര സജീവമാണെന്ന് ബിജെപി സംസ്ഥാന അധ്യക്ഷൻ കെ.സുരേന്ദ്രൻ.

മുസ്ലിം ലീഗിലെ ഒരു വിഭാഗം ഇടതുമുന്നണിയിലേക്ക് പോകുന്നതിനുള്ള ശ്രമമാണ് ഇപ്പോൾ നടക്കുന്നതെന്നും പാണക്കാട് ഹൈദരലി തങ്ങളുടെ മകനുമായി ചേർന്ന് കെ.ടി ജലീലാണ് കരുനീക്കം നടത്തുന്നതെന്നും കെ.സുരേന്ദ്രൻ ആരോപിച്ചു.

അധികാരമില്ലാതെ നിലനിൽപ്പില്ലെന്ന് മുസ്ലിം ലീഗിനുള്ളിൽ ചിലർക്ക് വന്ന തിരിച്ചറിവാണ് ഇപ്പോഴുള്ള സംഭവ വികാസങ്ങൾക്ക് കാരണം.

കുഞ്ഞാലിക്കുട്ടി വിഭാഗമോ, പാണക്കാട് കുടുംബമോ അധികം വൈകാതെ ഇടതുമുന്നണിയിലേക്ക് പോകുമെന്നും കെ.സുരേന്ദ്രൻ മാധ്യമങ്ങളോട് പറഞ്ഞു.

വർഗീയ നിലപാടുകൾക്ക് എന്നും പിന്തുണ നൽകിയ പാരമ്പര്യമാണ് ഇടതുപക്ഷത്തിന് ഉള്ളതെന്നും അത്തരം ശക്തികൾക്ക് തഴച്ചുവളരാനുള്ള വിത്ത് പിണറായി വിജയൻ കേരളത്തിൽ വിതച്ചെന്നും അദ്ദേഹം ആരോപിച്ചു.