മലപ്പുറം: കോട്ടക്കലിൽ എച്ച് വൺ എൻ വൺ സ്ഥിരീകരിച്ചതോടെ പ്രതിരോധ നടപടികളുമായി ആരോഗ്യവകുപ്പ് രംഗത്ത്. വീടുകൾ കയറിയിറങ്ങിയുള്ള ബോധവത്ക്കരണം ആരംഭിച്ചു. എച്ച് വൺ എൻ വൺ രോഗം ബാധിച്ച് രണ്ട് പേരാണ് ചികിത്സയിലുണ്ടായിരുന്നത്. ഈ സാഹചര്യത്തിലാണ് കോട്ടക്കൽ സിഎച്ച്‌സി ഹെൽത്ത് വിഭാഗത്തിന്‍റെ നേതൃത്വത്തിൽ ബോധവത്ക്കരണ പരിപാടികൾ ആരംഭിച്ചത്.
രോഗലക്ഷണങ്ങൾ കണ്ടാൽ സ്വയം ചികിത്സക്ക് മുതിരാതെ ആശുപത്രിയിൽ ചികിത്സ തേടണമെന്ന് അധികൃതർ നിർദേശിച്ചു. ആശങ്കപ്പെടേണ്ടതില്ലെന്നും ജാഗ്രത പുലർത്തണമെന്നും മെഡിക്കൽ ഓഫീസർ ഡോ. സയിദ് ഫസൽ പറഞ്ഞു. പകര്‍ച്ചയിലൂടെ മാത്രമേ രോഗം പടരൂവെന്നും യഥാസമയം ചികിത്സ ഉറപ്പാക്കണമെന്നും അദ്ദേഹം ആവശ്യപ്പെട്ടു. കോട്ടക്കലിൽ ചികിത്സയിൽ കഴിയുന്ന വളാഞ്ചേരി കുറ്റിപ്പുറം സ്വദേശിയുടെ രോഗം ഭേദമായതായി ആശുപത്രി അധികൃതർ അറിയിച്ചിരുന്നു. ഹെൽത്ത് ഇൻസ്പെക്‌ടർ സിഎച്ച് ഗിരീഷ് ബാബു, നഴ്‌സുമാരായ കെഎസ് സഞ്ജു, എ സിനി, ആശ വർക്കർ നസീറ വടക്കേതിൽ തുടങ്ങിയവര്‍ ബോധവത്ക്കരണ പരിപാടികൾക്ക് നേതൃത്വം നൽകി. അമ്പതിലധികം വീടുകളില്‍ ഇവര്‍ സന്ദർശനം നടത്തി.