വടകര കസ്റ്റഡി മരണത്തില്‍ കൂട്ട നടപടി ; 66 പൊലീസുകാരെ സ്ഥലം മാറ്റി

ഡ്യൂട്ടിയിലുണ്ടായിരുന്ന എസ്.ഐയുടെ മര്‍ദനമേറ്റാണ് കല്ലേരി സ്വദേശി സജീവന്‍ (41) കുഴഞ്ഞുവീണ് മരിച്ചതെന്ന ആരോപണത്തെ തുടര്‍ന്ന് ഉന്നതതല അന്വേഷണം നടന്നിരുന്നു. തുടര്‍ന്ന്, ഡി.ജി.പി മുഖ്യമന്ത്രിക്ക് നല്‍കിയ റിപ്പോർട്ടിനെ തുടര്‍ന്നാണ് നടപടി

കോഴിക്കോട് :വടകരയിൽ കസ്റ്റഡിയിലെടുത്ത യുവാവ് മരിച്ച സംഭവത്തിൽ പൊലീസുകാര്‍ക്കെതിരെ കൂട്ട നടപടി. എസ്.എച്ച്.ഒ ഉൾപ്പടെ 66 പൊലീസുകാരെ സ്ഥലം മാറ്റി. ഡി.ജി.പിയുടെ റിപ്പോർട്ടിൻ്റെ അടിസ്ഥാനത്തിൽ മുഖ്യമന്ത്രിയാണ് നടപടിക്ക് നിർദേശം നൽകിയത്.

സംഭവത്തിൽ പൊലീസുകാർക്ക് ഗുരുതര വീഴ്‌ചയുണ്ടായെന്നാണ് ഉത്തരമേഖല ഐ.ജി ടി വിക്രമിന്‍റെ കണ്ടെത്തല്‍. അതിനിടെ സജീവൻ്റെ മരണത്തിൽ ഒരു പൊലീസുകാരനെ കൂടി സസ്പെൻഡ് ചെയ്‌തു. സിവിൽ പൊലീസ് ഉദ്യോഗസ്ഥനായ സജീഷിനെതിരെയാണ് നടപടി. ഇതോടെ സംഭവത്തിൽ സസ്പെൻഷനിലായവരുടെ എണ്ണം നാലായി.

നടപടി നേരിട്ട ഉദ്യോഗസ്ഥരെ സ്റ്റേറ്റ് ക്രൈംബ്രാഞ്ച് ഇന്നും ചോദ്യം ചെയ്യും. ഇന്നുതന്നെ, കൂടുതൽ സാക്ഷികളെ ചോദ്യം ചെയ്യുകയും സംഭവ സമയത്ത് ഡ്യൂട്ടിയിൽ ഉണ്ടായിരുന്നവരുടെ മൊഴിയെടുപ്പും നടത്തും. ഇതുവരെ ശേഖരിച്ച ശാസ്ത്രീയ തെളിവുകൾ വടകര കോടതിയിൽ സമർപ്പിച്ചിട്ടുണ്ട്.