'ഫോർവേഡ് കളിച്ച് കപ്പടിക്കാൻ തരൂരിന്‍റെ മലബാർ യാത്ര', വാഴ്‌ത്താനും വിലക്കാനും വെട്ടിയിടാനും പടയൊരുക്കം

ശശി തരൂരിനെ മുഖ്യാതിഥിയായി നിശ്ചയിച്ച് കണ്ണൂർ ഡിസിസിയും യൂത്ത് കോൺഗ്രസ് കോഴിക്കോട് ജില്ല കമ്മിറ്റിയും നിശ്ചയിച്ച പരിപാടികള്‍ മാറ്റിവച്ചതോടെയാണ് വിവാദങ്ങള്‍ ഉടലെടുത്തത്.

കോഴിക്കോട്: കോൺഗ്രസ് ദേശീയ അധ്യക്ഷനാവാൻ രണ്ടുപേർ മത്സരിച്ചത് ഓർമയുണ്ടല്ലോ?. അതിനോട് ചേർത്ത് വായിക്കേണ്ടതാണ് താഴെ പറയുന്നത്. പ്രസിഡന്‍റായത് മല്ലികാർജുൻ ഖാർഗെ, പ്രസിദ്ധനായത് ശശി തരൂരും. പോരാട്ടം കഴിയുമ്പോൾ തരൂർ 'ശശി'യാകും എന്നുകരുതിയ കോൺഗ്രസിലെ വാഴ്ത്തുപാട്ടുകാർക്ക് (ഗാന്ധി കുടുംബത്തിൻ്റെ ആജ്ഞാനുവർത്തികൾ) തെറ്റി. അത് വോട്ടിൻ്റെ എണ്ണം കണ്ടിട്ടല്ല. തരൂരിനെ മനസുകൊണ്ട് പ്രസിഡന്‍റായി വാഴ്ത്തിയ യുവജന ആർജവം കണ്ടിട്ടാണ്.

ചൊടിപ്പിച്ചത് തരൂരിന്‍റെ 'പ്ലേറ്റ് മാറ്റല്‍': അധ്യക്ഷ തെരഞ്ഞെടുപ്പിന് കിട്ടിയ മൈലേജ് അതിൻ്റെ അലയൊലികൾ അടങ്ങും മുന്‍പേ ഉപയോഗപ്പെടുത്തുകയാണ് ശശി തരൂർ. ഒന്ന് മത്സരിച്ച് പോയതിൻ്റെ പേരിൽ പ്രത്യേകിച്ച് പണിയൊന്നുമില്ലാത്ത അവസ്ഥയിലായിരുന്നു തരൂർ. തെരഞ്ഞെടുപ്പ് നടന്ന ഹിമാചലിലും നടക്കാനിരിക്കുന്ന ഗുജറാത്തിലുമൊക്കെ എന്തെങ്കിലും പണിക്ക് അയക്കുമെന്ന് പ്രതീക്ഷിച്ചിരുന്നു.

എന്നാൽ അതുണ്ടായില്ല എന്ന് മാത്രമല്ല, പ്രസ്ഥാനം തകർന്നാലും പ്രസ്ഥാവനയിറക്കുന്നവർ ജീവിച്ചിരുന്നാൽ മതി എന്ന നിലപാടുകാർ ഇപ്പോഴും തലപ്പത്ത് ശക്തരായി ഇരിപ്പുമാണ്. അവിടെയാണ് ശശി തരൂർ 'പ്ലേറ്റ്' മാറ്റിയത്. കേരളത്തിൽ അതിന് പറ്റിയ അന്തരീക്ഷവുമാണ്.

പറ്റിയ സമയം: നാക്ക് ദോഷം കൊണ്ട് കെപിസിസി പ്രസിഡന്‍റ് കെ സുധാകരൻ വെട്ടിലായ സമയമാണിത്. കേരളത്തിലെ കോൺഗ്രസിൽ ഇനി ഗ്രൂപ്പില്ല എന്ന് പറഞ്ഞ് നടന്നവർ ഗ്രൂപ്പിൻ്റെ പുതിയ സമവാക്യങ്ങൾ കണ്ട് തുടങ്ങിയിരിക്കുന്നു. 'ഒറ്റച്ചങ്കാണെന്ന്' പറഞ്ഞ് നടന്ന വിഡി സതീശനും സുധാകരനുമിടയിൽ ഒരു പാര കയറ്റിയവർക്ക് പക്ഷേ ഒന്ന് നിവർന്ന് നിൽക്കാനുള്ള ശേഷിയുമില്ല.

പിണറായിക്ക് തുടർഭരണം സമ്മാനിച്ചതിൻ്റെ ഹാങ്‌ഓവർ അവരെ കറക്കുകയാണ്. ആരോഗ്യ പ്രശ്‌നങ്ങളാൽ റെസ്റ്റെടുത്ത ഉമ്മൻചാണ്ടിയും സംഘവും എല്ലാം നിരീക്ഷിച്ചിരിപ്പുമാണ്. പ്രത്യേകിച്ച് ഒന്നിനും നാഥനില്ലാത്ത അവസ്ഥയിലാണ്, ശശി തരൂർ വീണ്ടും രംഗപ്രവേശം ചെയ്‌തിരിക്കുന്നത്. അതും നേതാക്കളോടെല്ലാം പടവെട്ടി ജനങ്ങളുടെ സ്വന്തക്കാരനായി മാറിയ എംകെ രാഘവൻ എംപിയുടെ ആശീർവാദത്തോടെ.

വിവാദ നിറം: കഴിഞ്ഞ നിയമസഭ തെരഞ്ഞെടുപ്പിൽ ആരൊക്കെയോ ചേർന്ന് പാകമല്ലാതെ തുന്നിച്ചേർത്ത മുഖ്യമന്ത്രി കുപ്പായം ഇപ്പോൾ വീണ്ടും തരൂരിനെ അണിയിച്ചിരിക്കുന്നു. എന്നാൽ, കോഴിക്കോട്ട് അവതരിച്ച തരൂരിൻ്റെ പരിപാടികളിൽ പങ്കെടുക്കാൻ തയാറായി നിന്നവർക്ക് നേരെ പാർട്ടി സംസ്ഥാന നേതൃത്വം കണ്ണുരുട്ടിയതോടെ പരിപാടികളിൽ നിന്ന് കോൺഗ്രസ് ഘടകങ്ങൾ പിൻമാറി. ഇതോടെ അതിന് വിവാദത്തിൻ്റെ നിറം വന്നു. അതോടെ വാർത്തകളിൽ തരൂർ നിറഞ്ഞു, ഉദ്ദേശിച്ചത് പോലെയൊക്കെ തന്നെ..!. കണ്ണൂർ ഡിസിസിയും യൂത്ത് കോൺഗ്രസ് കോഴിക്കോട് ജില്ല കമ്മിറ്റിയുമാണ് തരൂരിനെ മുഖ്യാതിഥിയായി നിശ്ചയിച്ച പരിപാടികൾ മാറ്റിവച്ചത്.

മാറ്റം സൂചിപ്പിക്കുന്നതെന്ത്..?:'മതനിരപേക്ഷതയും സംഘപരിവാർ ഉയർത്തുന്ന വെല്ലുവിളിയും’ എന്ന വിഷയത്തിൽ കോഴിക്കോട് യൂത്ത് കോൺഗ്രസ് ജില്ല കമ്മിറ്റി തരൂരിനെ മുഖ്യാതിഥി ആക്കിയായിരുന്നു പരിപാടി പ്ലാൻ ചെയ്‌തത്. എന്നാൽ, പരിപാടി മാറ്റിവച്ചതായി യൂത്ത് കോൺഗ്രസ് അറിയിക്കുകയായിരുന്നു. നവംബര്‍ 23ന് കണ്ണൂർ ഡിസിസി നടത്തുന്ന സെമിനാറിലും തരൂർ പങ്കെടുക്കുമെന്ന് സംഘാടകർ അറിയിച്ചിരുന്നു. ഡിസിസിയ്‌ക്ക് പകരം ഇതേ പരിപാടി കണ്ണൂർ ജവഹർ ലൈബ്രറി സംഘടിപ്പിക്കുമെന്നാണ് പുതിയ അറിയിപ്പ്.

യൂത്ത് കോൺഗ്രസ് നടത്താൻ നിശ്ചയിച്ചിരുന്ന സെമിനാർ അതേ വേദിയിൽ തന്നെ നെഹ്റു യൂത്ത് ഫൗണ്ടേഷൻ എന്ന സംഘടനയുടെ ബാനറിൽ നടത്താനാണ് തീരുമാനം. ബിജെപിയിലേക്ക് ചേക്കേറാൻ തയ്യാറെടുപ്പുകൾ നടത്തി എന്ന ആരോപണം നേരിട്ടവരാണ് തരൂരും സുധാകരനും. എന്നാൽ, തരൂർ ഇന്ന് സെമിനാറിൽ പങ്കെടുത്താൽ അത് തൻ്റെ മുകളിൽ അടിക്കുന്ന ആണിയായി മാറുമെന്ന് സുധാകരന് അറിയാം.

അതിൻ്റെ പരിണിത ഫലമാണ് നിശ്ചയിച്ച പരിപാടികളിലെ മാറ്റം. കോൺഗ്രസ് നേതൃത്വത്തിന്‍റെ അപ്രഖ്യാപിത വിലക്കുമായി ബന്ധപ്പെട്ട വിവാദങ്ങൾക്കിടെ ശശി തരൂരിൻ്റെ യാത്ര തുടരുകയാണ്. എംടി വാസുദേവൻ നായരെ സന്ദർശിച്ചതിന് പിന്നാലെ അന്തരിച്ച പ്രശസ്‌ത എഴുത്തുകാരൻ ടിപി രാജീവന്‍റെ വീട്ടിലും തരൂർ എത്തി. താമരശേരി രൂപത ബിഷപ്പ് മാർ റെമീജിയോസ് ഇഞ്ചനാനിയലുമായും തരൂർ കൂടിക്കാഴ്‌ച നടത്തിയിരുന്നു.

തരൂരിന്‍റെ പര്യടനം പാണക്കാട്ടേക്കും:മാഹി കലാഗ്രാമത്തിൽ നടക്കുന്ന ചടങ്ങിലും പങ്കെടുക്കാന്‍ ശശി തരൂരിന് പദ്ധതിയുണ്ട്. പാണക്കാട് തറവാട്ടിലെ സന്ദർശനമാണ് തരൂരിന്‍റെ പ്രധാന പരിപാടി. ഇവിടെ വച്ച് മുസ്‌ലിം ലീഗ് നേതാക്കളുമായി തരൂർ ചർച്ച നടത്തും. ബുധനാഴ്‌ച കണ്ണൂരിൽ നടക്കുന്ന വിവിധ പരിപാടികളിലും അദ്ദേഹം പങ്കെടുക്കുന്നുണ്ട്.

കോഴിക്കോട് താൻ പങ്കെടുക്കുന്ന സെമിനാറില്‍ നിന്ന് യൂത്ത് കോൺഗ്രസ് പിന്മാറിയ സംഭവത്തെക്കുറിച്ച് അന്വേഷണം വേണമെന്ന് ശശി തരൂർ ഇന്നലെ ആവശ്യപ്പെട്ടിരുന്നു. അനാവശ്യ വിവാദങ്ങള്‍ സൃഷ്‌ടിക്കാൻ പാടില്ലായിരുന്നു എന്നും അദ്ദേഹം വ്യക്തമാക്കി. തന്‍റെ സന്ദർശനവുമായി ബന്ധപ്പെട്ട് ഒരു ദിവസം നീണ്ട വിവാദങ്ങൾക്കൊടുവിലാണ് ഈ വിഷയത്തിൽ അന്വേഷണം വേണമെന്ന് ആവശ്യപ്പെട്ട് അദ്ദേഹം രംഗത്തുവന്നത്.

നെഹ്റു ഫൗണ്ടേഷൻ സംഘടിപ്പിച്ച മതേതരത്വവും സംഘപരിവാറും എന്ന വിഷയത്തിൽ നടന്ന സെമിനാറായിരുന്നു വേദി. യൂത്ത് കോണ്‍ഗ്രസ് പിന്മാറിയ സാഹചര്യത്തിലായിരുന്നു നെഹ്റു ഫൗണ്ടേഷന്‍ സംഘാടന ചുമതല ഏറ്റെടുത്തത്. വിവാദങ്ങളുടെ പശ്ചാത്തലത്തില്‍ കോണ്‍ഗ്രസ് പ്രവര്‍ത്തകര്‍ തരൂരിന് ആവേശകരമായ സ്വീകരണമാണ് നല്‍കിയത്.

'ചിലർ സൈഡ് ബെഞ്ചിലിരിക്കാൻ ആവശ്യപ്പെട്ട് കഴിഞ്ഞെന്നും എന്നാൽ ഫോർവേഡായി കളിക്കാനാണ് താത്‌പര്യമെന്നും' പറഞ്ഞാണ് ശശി തരൂരിൻ്റെ ഈ കിക്കുകൾ. ലോകത്തിൻ്റെ പല കോണുകളിലും പല കാലാവസ്ഥയിലും കളിച്ച തരൂരിന് ഇത് വളരെ യോജിച്ച കാലവസ്ഥയാണ്. കപ്പാണ് ലക്ഷ്യം, അതിന് കഴിഞ്ഞില്ലെങ്കിൽ 'ക്ലബ്ബ്' മാറി കളിക്കാനും മടി കാണിക്കില്ല.

ഇനി ഒന്നും നഷ്‌ടപ്പെടാനും ഭയക്കാനുമില്ലാത്ത തരൂരിന് ഇനി യഥേഷ്‌ടം കളി തുടരാം. കോൺഗ്രസ് അധ്യക്ഷ സ്ഥാനത്തേക്ക് മത്സരിച്ചപ്പോൾ വിലങ്ങുതടിയായി നിന്നവരെ ലാക്കാക്കിയാണ് ഈ കളി.