കോഴിക്കോട് : നഴ്‌സറി കാലം തൊട്ടുള്ള പരിചയക്കാർ. വളരുന്തോറും കാൽപന്തിന് പിന്നാലെ ഓടിനടന്നവർ. കോട്ടൂർ പഞ്ചായത്തിലെ പൂനത്തെ നാൽപതോളം വരുന്ന ചെറുപ്പക്കാരെ അവർ തന്നെ വിളിച്ചത് ' തെക്കു വടക്ക് സർവീസുകാർ ' എന്നാണ്. അതിൻ്റെ ചുരുക്കമാണ് ടി വി എസ്.
തെങ്ങിൻതോപ്പുകളിലും, റോഡിലും പന്ത് തട്ടി നടന്ന പത്ത് നാൽപതോളം ചെറുപ്പക്കാർ. സ്ഥലം ഉടമസ്ഥർ ആട്ടിയോടിക്കുമ്പോൾ പാതി വഴിക്ക് നിന്നു പോയ മത്സരങ്ങൾ. പക്ഷേ അവർ സർവീസ് നിർത്തിയില്ല. തട്ടിക്കൂട്ടിയ ഷെഡിലിരുന്ന് അവർ ചിന്തിച്ചു. ഒരു കളിസ്ഥലം ഒരുക്കാൻ.
കാൽപന്ത് കളിക്കാൻ കളിസ്ഥലം ഒരുക്കിയ കഥ പറഞ്ഞ് ടി വി എസ്
മൂന്ന് വർഷം മുൻപാണ് സ്വന്തം മൈതാനം എന്ന ഒരാശയം അവരിൽ ഉദിച്ചത്. മൈതാനത്തിനായി പത്ത് സെന്‍റ് ഭൂമി വാങ്ങുകയായിരുന്നു ലക്ഷ്യം. പത്ത് സെന്‍റ് മാത്രമായി കൊടുക്കില്ലെന്ന് ഉടമസ്ഥർ പറഞ്ഞു. അങ്ങിനെ പാറപ്പുറത്തെ ഒരേക്കർ പറമ്പ് വാങ്ങാൻ തീരുമാനിച്ചു.