കോഴിക്കോട് : പിച്ചവയ്ക്കുന്ന പ്രായത്തില്‍ പുഴയില്‍ സഹോദരങ്ങള്‍ക്കൊപ്പം മത്സരിച്ച് നീന്തുന്ന തിരക്കിലാണ് മൂന്ന് വയസുകാരിയായ റന ഫാത്തിമ. കാഴ്ചക്കാരെ അമ്പരപ്പിച്ചുകൊണ്ട് ഉയരത്തില്‍ നിന്നും വെള്ളത്തിലേക്ക് എടുത്തുചാടാനും ഊളിയിടാനും റന മിടുക്കിയാണ്. സമൂഹമാധ്യമങ്ങളില്‍ റനയുടെ നീന്തല്‍ വൈറലായിരുന്നു.
പുഴയിലേക്ക് ചാടും, ഊളിയിടും ; ഒഴുക്കിലും നീന്തിവിസ്‌മയിപ്പിച്ച് മൂന്ന് വയസുകാരി റന
മാധ്യമ പ്രവര്‍ത്തകനായ റഫീഖ്‌ തോട്ടുമുക്കിന്‍റെയും റിഫാന റഫീഖിന്‍റെയും മകളാണ് റന ഫാത്തിമ. വല്യുമ്മ റംല മനാഫാണ് ഗുരു. അലക്കാനും മറ്റും തോട്ടുമുക്കം ചെറുപുഴയില്‍ പോകുമ്പോള്‍ വല്യുമ്മയ്‌ക്കൊപ്പം റനയും കൂടും. പിന്നെ നീന്തല്‍ പഠനവും. റനയെ മാത്രമല്ല മൂത്ത മകളുടെ മക്കളെയും റംല തന്നെയാണ് നീന്തല്‍ പഠിപ്പിച്ചത്.