കോഴിക്കോട്: കോളജിലെ റാഗിങും മാനസിക പീഡനവും കാരണം നഴ്‌സിങ് പഠനം ഉപേക്ഷിച്ച വിദ്യാർഥിക്ക് 10-ാം ക്ലാസ് മുതലുള്ള സർട്ടിഫിക്കറ്റ് തിരിച്ചു നൽകാത്ത കോളജ് അധികൃതരുടെ നടപടിക്കെതിരെ പ്രത്യക്ഷ സമരവുമായി ആർഎംപിയുടെ യുവജന സംഘടനയായ റവല്യൂഷണറി യൂത്ത്. വിഷയത്തിൽ ആദ്യഘട്ട സമരം എന്ന നിലയിൽ ജൂലൈ മൂന്നിന് കോഴിക്കോട് കലക്‌ടറേറ്റിന് മുമ്പിൽ ഉപവാസമിരിക്കുമെന്ന് റവല്യൂഷണറി യൂത്ത് സംസ്ഥാന കോ-ഓർഡിനേഷൻ കമ്മിറ്റി കൺവീനർ ടികെ സിബി വാർത്താസമ്മേളനത്തിൽ അറിയിച്ചു. മുഖ്യമന്ത്രിക്കും ജില്ലാ കലക്‌ടര്‍ക്കും എംഎൽഎക്കും പരാതി നൽകിയിട്ടും നടപടിയില്ലാത്തതിനാലാണ് ആദ്യ ഘട്ടത്തിൽ കലക്‌ടറേറ്റ് ഉപരോധിക്കുന്നതെന്നും അദ്ദേഹം പറഞ്ഞു.
സർട്ടിഫിക്കറ്റ് തടഞ്ഞുവെച്ച സംഭവം: റവല്യൂഷണറി യൂത്ത് ജൂലൈ മൂന്നിന് കളക്‌ടറേറ്റിന് മുമ്പിൽ ഉപവാസമിരിക്കും ചേളന്നൂർ സ്വദേശിയായ എസ് ആതിരയുടെ സർട്ടിഫിക്കറ്റുകളാണ് തമിഴ്നാട് പേരമ്പല്ലൂർ ശ്രീനിവാസൻ കോളജ് ഓഫ് നഴ്‌സിങ് അധികൃതർ തടഞ്ഞ് വച്ചിരിക്കുന്നത്. മൂന്ന് മാസം മാത്രം കോളജിൽ നഴ്‌സിങ്ങിന് പഠിച്ച ആതിര ഒരു വർഷത്തെ ഫീസായ 1,30,000 രൂപ അടച്ചിരുന്നു. ബാക്കി നാല് വർഷത്തേക്കുള്ള ഫീസായ അഞ്ച് ലക്ഷം രൂപ അടച്ചെങ്കിലേ സർട്ടിഫിക്കറ്റുകൾ വിട്ടു നൽകാൻ കഴിയുകയുള്ളുവെന്നാണ് കോളജ് അധികൃതരുടെ നിലപാട്. സംഭവത്തിൽ കേന്ദ്ര മാനവ വിഭവശേഷി മന്ത്രാലയത്തിനും, യുജിസിക്കും, കേരള വിദ്യാഭ്യാസ മന്ത്രിക്കും, ദേശീയ മനുഷ്യാവകാശ കമ്മീഷനും റവല്യൂഷണറി യൂത്ത് പരാതി നൽകിയിട്ടുണ്ട്. അധികാരികളുടെ ഭാഗത്ത് നിന്ന് നടപടി ഇല്ലാത്ത സാഹചര്യത്തിലാണ് സമരവുമായി രംഗത്തിറങ്ങുന്നതെന്നും റവല്യൂഷണറി യൂത്ത് ഭാരവാഹികൾ അറിയിച്ചു.
വാർത്താസമ്മേളനത്തിൽ ആതിര, അമ്മ ജിവിഷ, റവല്യൂഷണറി യൂത്ത് സംസ്ഥാന കോ-ഓർഡിനേഷൻ കമ്മിറ്റി അംഗം ജിജിത് സോമൻ, ജില്ലാ കമ്മിറ്റി അംഗം ജി രതീഷ്, ഒഞ്ചിയം ബ്ലോക്ക് കമ്മിറ്റി അംഗം കെകെ അശ്വതി എന്നിവരും പങ്കെടുത്തു.
