കോഴിക്കോട് : നടപടികൾ ശക്തമാക്കിയെന്ന് പറയുമ്പോഴും സ്വകാര്യ ബസുകളുടെ മരണപ്പാച്ചിലിന് വേഗം കൂടുകയാണ്. അപകടം വരുത്തിവയ്ക്കു‌ന്ന ഡ്രൈവർമാർക്കെതിരെ നടപടിയെടുത്തിട്ടും ഒരു ഫലവും കാണുന്നില്ല. പതിമൂന്നും പതിനൊന്നും വയസുള്ള രണ്ട് കുഞ്ഞുങ്ങളെ അനാഥരാക്കി, ഒരു ബസ് ഡ്രൈവർ ആ മാതാപിതാക്കളുടെ ജീവൻ എടുത്തപ്പോൾ പുറത്തുവരുന്ന കണക്കുകൾ ഭയപ്പെടുത്തുന്നതും ഞെട്ടിക്കുന്നതുമാണ്. ജില്ലയിൽ മാത്രം ഒരു വർഷത്തിനിടെ സസ്പെൻഷൻ വാങ്ങിയ ഡ്രൈവർമാരുടെ എണ്ണം 600-ൽ ഏറെ.
ഇതിൽ മനുഷ്യ ജീവനെടുത്തവരുടെ എണ്ണം ഒമ്പതാണ്. അമിതവേഗത്തിൽ വാഹനം ഓടിച്ചതിന് 375 ബസ് ഡ്രൈവർമാരുടെ ലൈസൻസുകൾ സസ്പെൻഡ് ചെയ്‌തപ്പോൾ മൊബൈൽ ഫോൺ ഉപയോഗിച്ചതിനും അലക്ഷ്യമായി വാഹനമോടിച്ചതിനും 192 ബസ് ഡ്രൈവർമാരുടെ ലൈസൻസും സസ്പെൻഡ് ചെയ്‌തു. മദ്യപിച്ച് വാഹനമോടിച്ച സംഭവങ്ങളിൽ 12 ബസ് ഡ്രൈവർമാരുടെയും അമിതമായി യാത്രക്കാരെ കയറ്റിയതിന് 22 ബസ് ഡ്രൈവർമാരുടെയും ലൈസൻസുകൾ താത്കാലികമായി മരവിപ്പിച്ചു.
മൂന്ന് മുതൽ ആറ് മാസം വരെയാണ് ലൈസൻസ് സസ്പെൻഷൻ കാലാവധി. അതുകഴിഞ്ഞ് വളയം പിടിക്കുമ്പോൾ പൂർവാധികം ശക്തിയോടെ ഇവർ 'പണി' തുടരും. എന്നിട്ടും ബസുകളുടെ മത്സരയോട്ടത്തിനും അമിത വേഗത്തിനും തടയിടാൻ മോട്ടോർ വാഹന വകുപ്പിന് കഴിയുന്നില്ല. ഇത്തരം ഡ്രൈവർമാരെ അനുകൂലിക്കുന്നവരും നാട്ടിൽ കുറവല്ല. അവർക്ക് യഥാസമയം ഓടിയെത്തേണ്ടതുകൊണ്ടല്ലേ ഈ മരണപ്പാച്ചിൽ എന്നാണ് അവരുടെ വാദം. എന്നാൽ സമയത്തിന്‍റെ പേരിൽ തമ്മിൽതല്ല് നടക്കുന്നത് ബസുകാർക്കിടയിലാണ്. അത് പരിശോധിക്കാനുള്ള ചെക്ക് പോസ്റ്റുകളിലൊന്നും ആൾപ്പെരുമാറ്റമില്ല.
സംസ്ഥാനത്ത് 2022 ൽ സ്വകാര്യ ബസുകൾ വരുത്തിവച്ച അപകടങ്ങളിൽ 215 പേരാണ് മരണപ്പെട്ടത്. 2021ൽ മരണ നിരക്ക് 115 ആയിരുന്നു. ഒരു വർഷം കൊണ്ട് നൂറ് പേരുടെ വർധനവാണ് ഉണ്ടായിട്ടുള്ളത്. കഴിഞ്ഞ വർഷം 1,902 അപകടങ്ങളാണ് സ്വകാര്യ ബസുകൾ കാരണം സംസ്ഥാനത്തുണ്ടായത്. ഇതിൽ 201 അപകടങ്ങളിൽ ജീവനുകൾ പൊലിഞ്ഞിട്ടുണ്ട്. മരിച്ചവരും ഗുരുതര പരിക്കേറ്റവരും നിസാര പരിക്കേറ്റവരും അടക്കം ആകെ 2,472 പേരാണ് അപകടത്തിൽപ്പെട്ടത്. 2021-ൽ സ്വകാര്യ ബസുകൾ മൂലമുണ്ടായത് 919 അപകടങ്ങളാണ്. ഇനിയും അപകടകാരികളായ ഡ്രൈവർമാരെ കയറൂരി വിട്ടാൽ റോഡിലെ കുരുതിക്കളങ്ങളുടെ എണ്ണം കൂടുകയേയുള്ളൂ.