പ്രധാനമന്ത്രി പദത്തിന്‍റെ മഹിമ മനസിലാക്കി സംസാരിക്കണമെന്ന് മോദിയോട് പിണറായി വിജയൻ

അയ്യപ്പന്‍റെയും ശബരിമലയുടെയും പേര് പറഞ്ഞ് അത്ഭുതങ്ങൾ സംഭവിപ്പിക്കാമെന്ന് മോദിയും അമിത് ഷായും മോഹിക്കണ്ടന്ന് മുഖ്യമന്ത്രി കോഴിക്കോട് പറഞ്ഞു

കോഴിക്കോട്:പ്രധാനമന്ത്രി പദത്തിന്‍റെ മഹിമ മനസിലാക്കി നരേന്ദ്ര മോദി സംസാരിക്കണമെന്ന് മുഖ്യമന്ത്രി പിണറായി വിജയൻ. ശബരിമലയെക്കുറിച്ച് പച്ചക്കള്ളം പ്രചരിപ്പിക്കരുതെന്നും ശബരിമലയിൽ അറസ്റ്റ് നടന്നത് കലാപഭൂമിയാക്കാനുള്ള ശ്രമം തടയാൻ വേണ്ടിയായിരുന്നുവെന്നും കോഴിക്കോട് കടലുണ്ടിയിൽ നടന്ന തെരഞ്ഞെടുപ്പ് പ്രചാരണ പൊതുയോഗത്തിൽ മുഖ്യമന്ത്രി പറഞ്ഞു.

ശബരിമലയുടെ പേരിൽ കേരളത്തിൽ മുതലെടുപ്പ് നടത്താമെന്ന് കരുതേണ്ട, ശബരിമലയെ അതിന്‍റെ ഉന്നതമായ പദവിയിലേക്ക് ഉയർത്താനുള്ള നടപടികൾ അതിവേഗം പൂർത്തിയാക്കുമെന്നും പിണറായി വിജയൻ പറഞ്ഞു. അയ്യപ്പന്‍റെയും ശബരിമലയുടെയും പേര് പറഞ്ഞ് അത്ഭുതങ്ങൾ സംഭവിപ്പിക്കാമെന്ന് മോദിയും അമിത് ഷായും മോഹിക്കണ്ട, അക്രമം കാണിക്കാൻ ആര് പുറപ്പെട്ടാലും അഴിയെണ്ണേണ്ടി വരും. കോഴിക്കോട്ടെ ബിജെപി സ്ഥാനാർഥിക്കെതിരെ കേസ് എടുത്തത് സ്ഥാനാർഥിയാകുന്നതിന് മുമ്പാണ്. ഇത് മോദിക്കും അമിത് ഷായ്ക്കും അറിയാത്തതല്ലെന്നും അവർ കള്ളം പ്രചരിപ്പിക്കുകയാണെന്നും പിണറായി പറഞ്ഞു.