യുഎപിഎ ഭേദഗതി ബില്ലിനെ പ്രതിപക്ഷം ഒറ്റക്കെട്ടായി എതിർക്കണമെന്ന് പിഡിപി
വ്യക്തികളെ ഭീകരവാദികളായി പ്രഖ്യാപിക്കാൻ എൻഐഎക്ക് അധികാരം നൽകുന്നതാണ് യുഎപിഎ ഭേദഗതി ബിൽ.
കോഴിക്കോട്: ലോക്‌സഭ പാസാക്കിയ യുഎപിഎ ഭേദഗതി ബില്ലിനെ രാജ്യസഭയിൽ കോൺഗ്രസ് ഉൾപ്പെടെയുള്ള പ്രതിപക്ഷ പാർട്ടികൾ ഒറ്റക്കെട്ടായി എതിർക്കണമെന്ന് പിഡിപി സംസ്ഥാന ഉപാധ്യക്ഷൻ പൂന്തുറ സിറാജ്. പൊലീസിന് അമിതാധികാര ഉപയോഗത്തിനും, ന്യൂനപക്ഷങ്ങൾക്കെതിരേ വിവേചനപരമായ ദുരുപയോഗത്തിനും കാരണമാവുന്ന ഭേദഗതി നടപ്പിൽ വരുത്തുന്നതിൽ നിന്ന് കേന്ദ്ര ഭരണകൂടം പിൻമാറണമെന്നും അദ്ദേഹം പറഞ്ഞു. കരിനിയമങ്ങളിൽ ഭേദഗതി വരുത്തി സംഘടനകളെയും വ്യക്തികളെയും ലക്ഷ്യം വെയ്ക്കുന്ന നടപടി വലിയ അപകടങ്ങളിലേക്ക് പോകും. കർണാടകത്തിൽ ആര് ഭരണത്തിലേറിയാലും അബ്ദുൾ നാസർ മഅദനിക്കെതിരെയുള്ള പീഡനത്തിന് ഒരു കുറവുമില്ലാത്ത സാഹചര്യമാണെന്നും കോഴിക്കോട് നടന്ന വാർത്താസമ്മേളനത്തിൽ അദ്ദേഹം പറഞ്ഞു. പിഡിപി സംസ്ഥാന ജനറൽ സെക്രട്ടറിമാരായ നിസാർ മേത്തർ, യൂസഫ് പാന്തറ, നൗഷാദ് തിക്കോടി, കേന്ദ്ര കമ്മിറ്റിയംഗം മജീദ് ചേർപ്പ് എന്നിവർ വാർത്താസമ്മേളനത്തിൽ പങ്കെടുത്തു.