കോഴിക്കോട്‌: അയല്‍വാസികളായ രണ്ട് യുവാക്കളെ ഒരേ ദിവസം തൂങ്ങി മരിച്ച നിലയില്‍ കണ്ടെത്തി. നന്മണ്ട സ്വദേശികളായ അഭിനന്ദ് (27), വിജീഷ്‌ (34) എന്നിവരാണ് മരിച്ചത്. തിങ്കളാഴ്‌ച പുലര്‍ച്ചെയാണ് സംഭവം. അഭിനന്ദിനെ വീട്ടിലെ അടുക്കളയിലും വിജീഷിനെ വീടിന് സമീപത്തെ വിറക്‌പുരയിലുമാണ് മരിച്ച നിലയില്‍ കണ്ടെത്തിയത്.
ഇരുവരുടേയും മൃതദേഹങ്ങള്‍ കോഴിക്കോട്‌ മെഡിക്കല്‍ കോളജിൽ പോസ്റ്റ്‌മോര്‍ട്ടത്തിന് ശേഷം വീട്ടുവളപ്പില്‍ സംസ്‌കരിച്ചു. വീടിന് സമീപത്തെ ക്ഷേത്രത്തിലെ ഉത്സവ ചടങ്ങുകള്‍ക്ക് ശേഷം വീട്ടില്‍ തിരിച്ചെത്തിയതായിരുന്നു അഭിനന്ദ്. വിജീഷ്‌ കൊടുങ്ങല്ലൂര്‍ ക്ഷേത്രത്തില്‍ നിന്നും ഞായറാഴ്‌ച വൈകിട്ടാണ് വീട്ടിലെത്തിയത്. സംഭവത്തില്‍ ബാലുശേരി പൊലീസ് കേസെടുത്ത് അന്വേഷണം ആരംഭിച്ചു.