കോഴിക്കോട്:കോട്ടൂളിയിലെ പെട്രോൾ പമ്പ് കവർച്ചയില്‍ മുന്‍ ജീവനക്കാരന്‍ പിടിയിലായ സംഭവത്തില്‍ കൂടുതല്‍ വിവരങ്ങള്‍ പുറത്ത്. ആർഭാട ജീവിതത്തിനായാണ് പ്രതി മോഷണം നടത്തിയത്. അന്വേഷണം വഴി തിരിച്ചുവിടാന്‍ കവര്‍ച്ച നടത്തിയ സമയത്ത് ഹിന്ദി സംസാരിച്ചെന്നും കോഴിക്കോട് സിറ്റി ഡി.സി.പി ആമോസ് മാമൻ വാര്‍ത്താസമ്മേളനത്തില്‍ അറിയിച്ചു.
കോട്ടൂളി കവര്‍ച്ചയില്‍ കൂടുതല്‍ വിവരങ്ങള്‍ പുറത്തുവിട്ട് അന്വേഷണ സംഘം
എടപ്പാൾ സ്വദേശി സാദിഖാണ് (22) അറസ്റ്റിലായത്. ബുധനാഴ്‌ച അര്‍ധ രാത്രിയായിരുന്നു സംഭവം. പമ്പിലെ ജീവനക്കാരനെ മര്‍ദിച്ച് അവശനാക്കി ബന്ദിയാക്കിയ ശേഷം കവര്‍ച്ച നടത്തുകയായിരുന്നു. 'ചുപ് രഹോ' എന്ന ഹിന്ദി വാക്ക് മോഷണത്തിനിടെ ഇയാള്‍ പറഞ്ഞു. കൃത്യ നിര്‍വഹണത്തിന് ഒരു മണിക്കൂർ മുന്‍പ് പമ്പിൽ എത്തി ആളുകൾ ഒഴിയുന്നതുവരെ പ്രതി ഒളിച്ചുനിന്നു.