കോഴിക്കോട്: കൂടത്തായി കൊലപാതകക്കേസില്‍ ജോളിയടക്കമുള്ള പ്രതികളുടെ കസ്റ്റഡി കാലാവധി രണ്ട് ദിവസത്തേക്ക് കൂടി നീട്ടി. മുഖ്യപ്രതി ജോളി, എം.എസ്‌.മാത്യു, പ്രജികുമാര്‍ എന്നിവരെ ഇന്ന് താമരശ്ശേരി കോടതിയില്‍ ഹാജരാക്കിയിരുന്നു. പ്രതികളെ കോയമ്പത്തൂരിൽ എത്തിച്ച് തെളിവെടുക്കണമെന്ന പ്രോസിക്യൂഷന്‍ വാദത്തിന്‍റെ അടിസ്ഥാനത്തിലാണ് കസ്റ്റഡി കാലാവധി ഈമാസം 18 വരെ നീട്ടിയത്. പ്രജികുമാർ സയനൈഡ് വാങ്ങിയത് കോയമ്പത്തൂരിൽ നിന്നാണെന്ന മൊഴിയുടെ അടിസ്ഥാനത്തിലാണ് തെളിവെടുപ്പ് നടത്തുന്നത്. എന്നാൽ മൂന്ന് പ്രതികളെയും കോയമ്പത്തൂരിൽ എത്തിക്കുമോയെന്ന് വ്യക്തമല്ല.
അതേസമയം കൂടത്തായി കൊലപാതക പരമ്പരയുമായി ബന്ധപ്പെട്ട് അഞ്ച് കേസുകൾ കൂടി രജിസ്റ്റർ ചെയ്‌തു. മുഖ്യപ്രതി ജോളിയും മാത്യുവും അഞ്ച് കേസുകളിലും പ്രതികളാവും. ജോളിയുടെ ആദ്യ ഭർത്താവ് റോയി തോമസിന്‍റെ കൊലപാതകവുമായി ബന്ധപ്പെട്ട് രജിസ്റ്റർ ചെയ്‌ത കേസിന് പുറമെയാണ് മറ്റ് അഞ്ച് കൊലപാതകങ്ങളിലും പ്രത്യേകം കേസുകൾ രജിസ്റ്റർ ചെയ്‌തത്.