എച്ച്‌വണ്‍ എന്‍വണ്‍ സ്ഥിരീകരണം; ജാഗ്രതയോടെ കോഴിക്കോട്

കാരിശ്ശേരി പഞ്ചായത്തിലെ മുഴുവൻ വിദ്യാഭ്യാസ സ്ഥാപനങ്ങൾക്കും തിങ്കളാഴ്‌ച വരെ അവധി.

കോഴിക്കോട്:മുക്കത്ത് കാരശ്ശേരിയില്‍ ആനയാംകുന്ന് സ്‌കൂളിലെ വിദ്യാർഥികൾക്ക് എച്ച്‌വൺ എൻവണ്‍ സ്ഥിരീകരിച്ച സാഹചര്യത്തിൽ കോഴിക്കോട് മെഡിക്കൽ കോളജിലെ വിദഗ്‌ധ ഡോക്‌ടർമാരുടെ നേതൃത്വത്തിൽ മെഡിക്കൽ ക്യാമ്പുകൾക്ക് തുടക്കം. വിവിധ സ്ഥലങ്ങളിലായാണ് ക്യാമ്പ് സംഘടിപ്പിക്കുന്നത്. കൂടുതൽ ആളുകൾ ഒരു സ്ഥലത്ത് കേന്ദ്രീകരിച്ചാൽ രോഗം പടരാൻ സാധ്യതയുള്ളതിനാല്‍ കുമരനെല്ലൂർ സാംസ്‌കാരിക നിലയം, കാരമൂല അംഗനവാടി, പിഎച്ച്സി തേക്കുംകുറ്റി, ആനയാംക്കുന്ന് സ്‌കൂൾ, മൈസൂർമല സബ് സെന്‍റർ, കറുത്തപറമ്പ് സാംസ്‌കാരികനിലയം തുടങ്ങിയ വ്യത്യസ്‌ത കേന്ദ്രങ്ങളിലായാണ് ക്യാമ്പ്. കൂടാതെ മുക്കം സിഎച്ച്‌സിയിലും മറ്റ് സ്വകാര്യ ആശുപത്രികളിലും ഇതിനായി പ്രത്യേക സൗകര്യങ്ങളും ഒരുക്കിയിട്ടുണ്ട്.

അതേസമയം ജില്ലാ മെഡിക്കല്‍ ഓഫീസര്‍ ജയശ്രീയുടെയും ഗ്രാമ പഞ്ചായത്ത് പ്രസിഡന്‍റ്, വാർഡ് മെമ്പർമാർ, ആരോഗ്യ വകുപ്പ് ഉദ്യോഗസ്ഥർ എന്നിവരുടെയും നേതൃത്വത്തിൽ അടിയന്തര യോഗം ചേർന്നു. എല്ലാ വാർഡുകളിലും അടിയന്തര യോഗം ചേരാനും പഞ്ചായത്തിലെ മുഴുവൻ വീടുകളിലും കയറി പനി ബാധിതരെ കണ്ടെത്താനും യോഗത്തിൽ തീരുമാനമായി. പനി ബാധിതരെ കണ്ടെത്തിയാൽ ഉടൻ അറിയിക്കണമെന്നും നിർദേശം നൽകിയിട്ടുണ്ട്. പഞ്ചായത്തിലെ മദ്രസകൾ, അംഗൻവാടികൾ ഉൾപ്പെടെയുള്ള മുഴുവൻ വിദ്യാഭ്യാസ സ്ഥാപനങ്ങൾക്കും തിങ്കളാഴ്‌ച വരെ അവധി നൽകാനും തീരുമാനിച്ചു. പനി പടരാനുള്ള സാഹചര്യം കണക്കിലെടുത്ത് ആളുകൾ കൂട്ടം കൂടി നിൽക്കുന്നതും യാത്രകളും പരമാവധി ഒഴിവാക്കണമെന്നും ഗ്രാമ പഞ്ചായത്ത് പ്രസിഡന്‍റ് വി.കെ.വിനോദ് പറഞ്ഞു.