പുതുവത്സരാഘോഷം; രഹസ്യ പരിശോധനയുമായി എക്‌സൈസ്

നിരോധിത ലഹരി ഉപയോഗിക്കുന്നത് തടയുന്നതിനായി ബുധനാഴ്ച പുലർച്ച വരെ പരിശോധന തുടരാനാണ് എക്സൈസ് തീരുമാനം

കോഴിക്കോട്: ജില്ലയിൽ പുതുവത്സരാഘോഷം അതിര് കടക്കാതിരിക്കാൻ കർശന പരിശോധനയുമായി എക്സൈസ് വകുപ്പ്. മദ്യശാലകൾക്ക് പുറമെ ആറ് ക്ലബുകൾക്കാണ് കോലിക്കോട് നഗരത്തിൽ മദ്യം വിളമ്പുന്നതിനുള്ള അനുമതിയുള്ളത്. ഇവ പൂർണമായും എക്സൈസിന്‍റെ നിരീക്ഷണത്തിലാകും പ്രവർത്തിക്കുക. ഇത്തരം ക്ലബുകളിൽ മദ്യത്തിന് പുറമെ മറ്റു ഉല്‍പന്നങ്ങൾ ഉപയോഗിക്കാൻ സൗകര്യം ഒരുക്കുന്നുണ്ടോയെന്നും പരിശോധിക്കും. ഇവിടങ്ങൾ എക്സൈസ് വകുപ്പ് കഴിഞ്ഞ ദിവസം മുതൽ രഹസ്യ പരിശോധന ആരംഭിച്ചിട്ടുണ്ട്. ചൊവ്വാഴ്ച രാവിലെ മുതൽ നഗരത്തിലെ മദ്യശാലകളും എക്സൈസിസിന്‍റെ രഹസ്യ നിരീക്ഷണത്തിലാണെന്ന് കോഴിക്കോട് ഡെപ്യൂട്ടി കമ്മിഷണർ വി. ആർ. അനിൽകുമാർ പറഞ്ഞു. നിരോധിത ലഹരി ഉപയോഗിക്കുന്നത് തടയുന്നതിനായി ബുധനാഴ്ച പുലർച്ച വരെ പരിശോധന തുടരാനാണ് എക്സൈസ് തീരുമാനം.