വടകരയിൽ വീട്ടമ്മയെ ബലാത്സംഗം ചെയ്‌ത സിപിഎം നേതാക്കള്‍ക്കെതിരെ കേസ്

സിപിഎം മുളിയേരി ബ്രാഞ്ച് സെക്രട്ടറി പുല്ലുള്ള പറമ്പത്ത് ബാബുരാജ്, ഡിവൈഎഫ്ഐ ബ്ലോക്ക് കമ്മിറ്റി അംഗം തെക്കെ പറമ്പത്ത് ലിജീഷ് എന്നിവര്‍ക്കെതിരെയാണ് കേസ്.

കോഴിക്കോട് : വടകരയിൽ വീട്ടമ്മയെ ഭീഷണിപ്പെടുത്തി ബലാത്സംഗം ചെയ്‌തെന്ന പരാതിയില്‍ സിപിഎം നേതാക്കള്‍ക്കെതിരെ കേസെടുത്തു. വടകര ബാങ്ക് റോഡിന് സമീപം താമസിക്കുന്ന സ്ത്രീയുടെ പരാതിയെ തുടർന്ന് വടകര പൊലീസാണ് കേസെടുത്തത്.

സിപിഎം മുളിയേരി ബ്രാഞ്ച് സെക്രട്ടറി പുല്ലുള്ള പറമ്പത്ത് ബാബുരാജ്, ഡിവൈഎഫ്ഐ ബ്ലോക്ക് കമ്മിറ്റി അംഗം തെക്കെ പറമ്പത്ത് ലിജീഷ് എന്നിവര്‍ക്കെതിരെയാണ് കേസ്.

രാത്രി പതിനൊന്ന് മണിയോടെ വീട്ടിൽ മറ്റാരുമില്ലാത്ത സമയത്ത് കതക് തള്ളിതുറന്ന് അകത്തുകയറിയ ബാബുരാജ് വീട്ടമ്മയെ കൊല്ലുമെന്ന് ഭീഷണിപ്പെടുത്തി പീഡിപ്പിച്ചെന്നാണ് പരാതി.

ഇതിന് ശേഷവും മൂന്ന് തവണ ഇത്തരത്തില്‍ പീഡനം തുടര്‍ന്നു. ഡിവൈഎഫ്ഐ നേതാവ് ലിജീഷിനോട് ഇക്കാര്യം പറഞ്ഞെങ്കിലും ഇയാളും വീട്ടിലെത്തി ഭീഷണിപ്പെടുത്തി പീഡിപ്പിക്കുകയായിരുന്നുവെന്നും പരാതിയിൽ പറയുന്നു.

നിരന്തരം ഇവരുടെ ഭീഷണി തുടര്‍ന്നതോടെ വീട്ടമ്മ ഇക്കാര്യം ഭര്‍ത്താവിനെ അറിയിച്ചു. തുടര്‍ന്നാണ് ഇവര്‍ വടകര പൊലീസില്‍ പരാതി നല്‍കിയത്. രണ്ടുപേരും ഒളിവിലാണെന്നാണ് പൊലീസ് നൽകുന്ന വിവരം.

അതേസമയം ഇരുവരെയും പാര്‍ട്ടിയുടെ പ്രാഥമിക അംഗത്വത്തില്‍ നിന്നും പുറത്താക്കിയതായി സിപിഎം നേതൃത്വം അറിയിച്ചു.