കോഴിക്കോട്: തിരുവനന്തപുരത്തും കോഴിക്കോട്ടുമായി കള്ളനോട്ട് പിടിച്ചെടുത്ത സംഭവത്തിലെ മുഖ്യപ്രതി കുന്ദമംഗലം സ്വദേശി ഷമീറിനെ തെളിവെടുപ്പിനെത്തിച്ചു. ഇന്ന് രാവിലെയാണ് ആറ്റിങ്ങല്‍ സര്‍ക്കിള്‍ ഇന്‍സ്‌പെക്‌ടര്‍ ദിപിന്‍റെ നേതൃത്വത്തിലുള്ള സംഘം തെളിവെടുപ്പിനായി കൊണ്ടുവന്നത്. പിലാശ്ശേരിയില്‍ കള്ളനോട്ടടിക്കാനായി വാടകക്കെടുത്ത വീടും പരിസരവും പ്രതി തെളിവെടുപ്പ് സംഘത്തിന് കാണിച്ചുകൊടുത്തു. ഇന്നലെയാണ് ഷമീറിനെ തെളിവെടുപ്പിനായി കസ്റ്റഡിയില്‍ വാങ്ങിയത്.
കഴിഞ്ഞ ദിവസം നടന്ന റെയ്‌ഡില്‍ 20 ലക്ഷത്തിലധികം രൂപയുടെ കള്ളനോട്ടുകളും കള്ളനോട്ട് അടിക്കാന്‍ ഉപയോഗിച്ച യന്ത്രങ്ങളുമാണ് കണ്ടെത്തിയത്. ആറ്റിങ്ങല്‍ സ്വദേശി പത്രോസിന്‍റെ ഹോസ്‌പിറ്റല്‍ ചികിത്സക്കിടെയാണ് കേസിന്‍റെ സൂചന ലഭിക്കുന്നത്. ഗോപുരം മെഡിക്കല്‍ ട്രസ്റ്റ് ഹോസ്‌പിറ്റലില്‍ ബില്ലടച്ചപ്പോള്‍ കള്ളനോട്ട് ശ്രദ്ധയില്‍പെട്ടതിനെ തുടര്‍ന്ന് അധികൃതര്‍ പൊലീസിനെ അറിയിക്കുകയായിരുന്നു. തുടര്‍ന്ന് പൊലീസ് പത്രോസിനെ അറസ്റ്റ് ചെയ്യുകയും പത്രോസില്‍ നിന്ന് ചിറയന്‍കീഴിലുള്ള പ്രതാപനിലേക്ക് കേസ് നീളുകയും ചെയ്‌തു. പ്രതാപനില്‍ നിന്നും വഹാബിന്‍റെ പങ്കിനെ കുറിച്ച് അന്വേഷണം നടത്തുകയും ഇവരില്‍ നിന്നും ഷമീറിന്‍റെ പങ്ക് പൊലീസ് കണ്ടെത്തുകയുമായിരുന്നു.
