മഞ്ഞപ്പിത്തം ബാധിച്ച് ചികിത്സയിലായിരുന്ന വിദ്യാർഥിനി മരിച്ചു; സ്വകാര്യ ആശുപത്രിക്കെതിരെ പരാതിയുമായി പിതാവ്

പനിയും വയറുവേദനയും അനുഭവപ്പെട്ട രസിക മെഡിക്കൽ സ്റ്റോറിൽ നിന്നും മരുന്ന് വാങ്ങിക്കഴിച്ചതിനെ തുടർന്ന് തുടർച്ചയായി ഛർദിച്ചിരുന്നു. ഇതോടെ ആശുപത്രിയിൽ പ്രവേശിച്ച വിദ്യാർഥിനി ഞായറാഴ്‌ച മരണപ്പെടുകയായിരുന്നു

കോട്ടയം: മഞ്ഞപ്പിത്തം ബാധിച്ച് സ്വകാര്യ ആശുപത്രിയിൽ ചികിത്സയിലായിരുന്ന പത്താം ക്ലാസ് വിദ്യാർഥിനി മരിച്ചു. കോട്ടയം കൊല്ലാട് വട്ടുകുന്നേൽ ഇരട്ടപ്ലാമൂട്ടിൽ സ്വദേശിയായ ഇആർ രാജീവിന്‍റെ മകൾ രസികയാണ്​ (15) മരിച്ചത്​. പെൺകുട്ടിയുടെ മരണത്തിൽ പിതാവ്​, കോട്ടയം ഈസ്റ്റ്​ പൊലീസ് സ്റ്റേഷനിൽ പരാതി നൽകി.

കോട്ടയം മൗണ്ട്​ കാർമ്മൽ ഗേൾസ് സ്‌കൂളിലെ പത്താം ക്ലാസ്​ വിദ്യാർഥിനിയായിരുന്നു രസിക. കഴിഞ്ഞദിവസം പനിയും അസഹ്യമായ വയറുവേദനയും​ അനുഭവപ്പെട്ടിരുന്നു. തുടർന്ന്​ മെഡിക്കൽ ഷോപ്പിൽ നിന്നും​ ഗുളിക വാങ്ങികഴിച്ചിരുന്നതായി ബന്ധുക്കൾ പറയുന്നു. മരുന്ന് കഴിച്ചതിന് പിന്നാലെ​ തുടർച്ചയായി ഛർദിച്ചതിനെ തുടർന്ന് രസികയെ​ കോട്ടയത്തെ സ്വകാര്യ ആശുപത്രിയിൽ പ്രവേശിപ്പിക്കുകയായിരിന്നു.

തുടർന്ന്, അവശത വർധിച്ചതോടെ ​മറ്റൊരു സ്വകാര്യ ആശുപത്രിയിലേക്ക്​ മാറ്റിയെങ്കിലും ഞായറാഴ്‌ച രാത്രി 7.30ഓടെ മരണപ്പെടു​കയായിരുന്നു. മഞ്ഞപ്പിത്തമാണ്​ കുട്ടിയുടെ മരണത്തിന് കാരണമെന്ന്​ ആശുപത്രി അധികൃതർ വ്യക്‌തമാക്കുന്നത്​. പിതാവിൻ്റെ പരാതിയിൽ അസ്വാഭാവികമായ മരണത്തിന്​ പൊലീസ്​ കേസെടുത്തു. പോസ്റ്റ്‌മോർട്ടം റിപ്പോർട്ടിന് ശേഷം മാത്രമെ മരണകാരണം വ്യക്തമാകുകയുള്ളൂ എന്ന് പൊലീസ്​ പറഞ്ഞു.