അനധികൃത മദ്യ വിൽപന; ഒരാൾ പിടിയിൽ

അര ലിറ്ററിന്‍റെ 38 കുപ്പികളിൽ ആയി 19 ലിറ്റർ വിദേശമദ്യം ആണ് പിടികൂടിയത്

കോട്ടയം:അമിത വിലക്ക് അനധികൃത മദ്യ വിൽപന നടത്തിയ പാലാ സ്വദേശിയെ എക്സൈസ് പിടികൂടി. പാലാ പൂവരണി വല്ല്യാത്തു വീട്ടിൽ മോഹൻ (60) നെയാണ് പാലാ എക്സൈസ് റേഞ്ച് ഇൻസ്പെക്ടർ കെ.ബി. ബിനുവും സംഘവും ചേർന്ന് അറസ്റ്റ് ചെയ്തത്. ഇയാളുടെ പക്കൽ നിന്ന് അര ലിറ്ററിന്‍റെ 38 കുപ്പികളിൽ ആയി 19 ലിറ്റർ വിദേശമദ്യം ആണ് പിടികൂടിയത്.
കൊഴുവനാൽ പഞ്ചായത്തിന്‍റെ ഉടമസ്ഥതയിലുള്ള "ജലനിധി" പമ്പ് ഹൗസിനുള്ളിലാണ് മദ്യം സൂക്ഷിച്ചിരുന്നത്. ഡ്രൈ ഡേ മുന്നിൽ കണ്ട് മുൻ ദിവങ്ങളിൽ മദ്യം വാങ്ങി ശേഖരിക്കുകയാണ് പ്രതി ചെയ്തിരുന്നത്. ഗാന്ധി ജയന്തി ദിനത്തിൽ പൂവരണി ഭാഗത്ത് നടന്ന രാത്രികാല പരിശോധനയിലാണ് ഡ്രൈ ഡേ മദ്യ വിൽപന സംബന്ധിച്ച് പൊലീസിന് വിവരം ലഭിച്ചത്. മദ്യം ശേഖരിച്ച സ്ഥലത്തെ പറ്റി കൃത്യമായി മനസ്സിലാക്കിയശേഷം ആയിരുന്നു അറസ്റ്റ്. പാലാ ജുഡീഷ്യൽ ഒന്നാം ക്ലാസ് മജിസ്ട്രേറ്റ് കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.