കോട്ടയം : റോഡുനിർമാണം പുനരാരംഭിക്കണമെന്നാവശ്യപ്പെട്ട് പഞ്ചായത്തംഗത്തിന്‍റെ ശയനപ്രദക്ഷിണം. നീണ്ടൂർ പഞ്ചായത്ത് അഞ്ചാം വാർഡിലെ ചെറുമുട്ടം - പന്നക്കൽ റോഡിന്‍റെ പണി പുനരാരംഭിക്കണമെന്ന് ആവശ്യപ്പെട്ട് അഞ്ചാം വാർഡ് മെമ്പർ സൗമ്യ വിനീഷാണ് റോഡിൽ ശയനപ്രദക്ഷിണ സമരം നടത്തിയത്. കോൺഗ്രസ് അംഗമാണ് സൗമ്യ.
റോഡുനിർമാണം പുനരാരംഭിക്കണം
മുൻ എംഎൽഎ സുരേഷ് കുറുപ്പ് 2019 ൽ ഈ റോഡ് നിർമാണത്തിനായി 12 ലക്ഷം രൂപ അനുവദിച്ചിരുന്നു. 2020ൽ ടെൻഡർ നടത്തി കോൺട്രാക്‌ടര്‍ എഗ്രിമെന്‍റ് വച്ചെങ്കിലും പണികൾ തുടങ്ങിയില്ല. പഞ്ചായത്ത് മെമ്പറുടെ നേതൃത്വത്തിൽ നാട്ടുകാർ നടത്തിയ നിരന്തര സമ്മർദത്തെത്തുടർന്ന് ഈ വർഷമാദ്യം റോഡിൽ മെറ്റൽ നിരത്തിയെങ്കിലും വീണ്ടും പണികൾ മുടങ്ങുകയായിരുന്നു.