കോട്ടയം :കർഷകരോട് മുൻകാലങ്ങളിൽ സ്വീകരിച്ച അതേ നില തന്നെയാണ് സംസ്ഥാന ബജറ്റിൽ തുടര്‍ന്നതെന്ന് കൃഷി മന്ത്രി പി പ്രസാദ്. ആരോഗ്യ, വിദ്യാഭ്യാസ മേഖലകൾക്കും പരിഗണന നൽകിയാണ് ബജറ്റ് അവതരിപ്പിച്ചിരിക്കുന്നത്. സങ്കുചിത രാഷ്ട്രീയ കാര്യങ്ങൾക്കപ്പുറം ബജറ്റിനെ കാണണമെന്നും മന്ത്രി പറഞ്ഞു.
ആരോഗ്യ, വിദ്യാഭ്യാസ മേഖലകളിലെ മാറ്റം നമ്മൾ കാണണം. ഏറ്റവും സാധാരണക്കാരെ സഹായിക്കണം. അതിന് പറ്റാവുന്ന രീതിയിൽ ധനം സമാഹരിച്ച് നല്ല പ്രവർത്തനം നടത്തണ്ടി വരും. അതിനാൽ ചില മേഖലകൾക്ക് പരിഗണന കൊടുത്തുകൊണ്ട് തന്നെ പണം സമാഹരിക്കാനുള്ള രീതിയാണ് ആലോചിക്കുന്നത്.
നികുതി സമാഹരണത്തിൽ സംസ്ഥാന സർക്കാർ വീഴ്‌ച വരുത്തിയിട്ടില്ല. എന്നാൽ ഇന്ധന വിലവർധനയുടെ പ്രശ്‌നം ഉണ്ടാകും. അത് പരിശോധിക്കും. ഇക്കാര്യത്തിൽ പുനഃപരിശോധന സിപിഐ ആവശ്യപ്പെടുമോ എന്ന ചോദ്യത്തിന് അത് ആലോചിച്ചിട്ടില്ലെന്നും മന്ത്രി പറഞ്ഞു. എഐവൈഎഫ് ഉൾപ്പടെ ബഹുജന സംഘടനകൾ അവരുടെ അഭിപ്രായം പറയുമെന്നും മന്ത്രി കൂട്ടിച്ചേർത്തു.
