കുട്ടിയെ തട്ടിയെടുത്തത് സുഹൃത്തുമായുള്ള ബന്ധം നിലനിര്‍ത്താന്‍, പ്രതി നീതു മാത്രം; പൊലീസ്

കളമശ്ശേരി സ്വദേശിയായ ഇബ്രാഹിം ബാദുഷയിലുള്ള ബന്ധത്തിൽ ഗർഭിണിയാണെന്ന് അറിയിച്ചു. കുട്ടിയെ തട്ടിയെടുത്തശേഷം മുറിയിലെത്തി കുട്ടിയുടെ ഫോട്ടോ ഇബ്രാഹിമിന് വാട്‌സ് ആപ്പ് വഴി അയച്ചു നൽകി. കുട്ടിയെ വളർത്താൻ തന്നെയായിരുന്നു തീരുമാനമെന്ന് നീതു പറഞ്ഞതായും പൊലീസ്.

കോട്ടയം: സുഹൃത്തുമായുള്ള ബന്ധം നിലനിർത്താൻ വേണ്ടി നവജാത ശിശുവിനെ തട്ടിയെടുത്തതാണെന്ന് പ്രതി നീതു വ്യക്തമാക്കിയതായി കോട്ടയം ജില്ലാ പൊലീസ് മേധാവി ഡി. ശില്‍പ. കളമശ്ശേരി സ്വദേശിയായ ഇബ്രാഹിം ബാദുഷയിലുള്ള ബന്ധത്തിൽ ഗർഭിണിയാണെന്ന് അറിയിച്ചു. ഇതിനിടെ രണ്ട് മാസത്തിന് ശേഷം ഗർഭം അലസിയെങ്കിലും ഇക്കാര്യം ബാദുഷയെ അറിയിച്ചിരുന്നില്ല.

ഇതിനിടെ ഇയാൾ വിവാഹിതനാകുവാൻ തീരുമാനിച്ചതോടെ ഫെബ്രുവരി മാസത്തിന് മുമ്പ് ഒരു കുഞ്ഞിനെ വേണമെന്ന ലക്ഷ്യത്തിലാണ് കോട്ടയം മെഡിക്കൽ കോളജിൽ നിന്ന് കുട്ടിയെ തട്ടിയെടുത്തത് എന്നും അവര്‍ വ്യക്താമാക്കി. ബാദുഷയെ നീതു പരിചയപ്പെട്ടത് ടിക്ക് ടോക്ക് വഴിയെന്നും പൊലീസ് പറഞ്ഞു.

ഇയാൾക്കെതിരെ മറ്റൊരു കേസെടുക്കും. ജനുവരി നാലാം തീയതി മെഡിക്കൽ കോളജിന് സമീപമുള്ള ഹോട്ടലിൽ നീതു താമസിച്ചിരുന്നു. ഇവിടെ നിന്നും ഗൈനക്കോളജി വാർഡിൽ എത്തി കുട്ടിയെ തട്ടിയെടുക്കുകയായിരുന്നു എന്നും പൊലീസ് വ്യക്തമാക്കി.

മുറിയിലെത്തി കുട്ടിയുടെ ഫോട്ടോ ഇബ്രാഹിമിന് വാട്‌സ്‌ ആപ്പ് വഴി അയച്ചു നൽകി. കുട്ടിയെ വളർത്താൻ തന്നെയായിരുന്നു തീരുമാനമെന്നും പൊലീസ് മേധാവി പറഞ്ഞു.