ബസിനടിയിലേക്ക് വീണ് പരിക്കേറ്റ കാൽനട യാത്രികൻ മരിച്ചു

പാമ്പാടി സ്വദേശി ജോര്‍ജാണ് മരിച്ചത്. ഇന്നലെ ഉച്ചയ്‌ക്കായിരുന്നു അപകടം. ഗുരുതരമായി പരിക്കേറ്റ ജോര്‍ജ് ചികിത്സയിലിരിക്കെ ഇന്ന് വൈകിട്ട് 6.20 ഓടെയാണ് മരിച്ചത്

കോട്ടയം:കെഎസ്ആർടിസി ബസിനടിയിലേക്ക് വീണ് പരിക്കേറ്റ കാൽനട യാത്രികൻ മരിച്ചു. പാമ്പാടി മീനടം മാലം കൊച്ചുത്താഴത്ത് (കുന്നുംപുറത്ത്) ജോർജ് കുര്യൻ (54) ആണ് മരിച്ചത്. ഇന്നലെ ഉച്ചയ്ക്ക് ടി ബി റോഡിലായിരുന്നു അപകടം.

തിരുവനന്തപുരം ഭാഗത്തേയ്ക്ക് പോകുകയായിരുന്ന കെഎസ്ആർടിസി ബസ് കടന്നു വരുമ്പോൾ റോഡരികിലൂടെ നടന്നു വന്ന ജോർജ് ബസിനടിയിലേക്ക് വീഴുകയായിരുന്നു. തലയ്ക്ക് ഗുരുതരമായി പരിക്കേറ്റ ജോർജിനെ സ്ഥലത്തെത്തിയ പൊലീസ് ജനറൽ ആശുപത്രിയിൽ പ്രവേശിപ്പിച്ചു. പിന്നീട് ഇയാളെ കോട്ടയം മെഡിക്കൽ കോളജ് ആശുപത്രിയിലേക്ക് മാറ്റി.

ചികിത്സയിലിരിക്കെ ഇന്ന് വൈകിട്ട് 6.20ന് മരിച്ചു. മൃതദേഹം മോർച്ചറിയിലേക്ക് മാറ്റി. ജോർജ് ബസിനടിയിലേക്ക് വീഴുന്നതിന്‍റെ സിസിടിവി ദൃശ്യങ്ങൾ പൊലീസിന് ലഭിച്ചിട്ടുണ്ട്.

കുഴഞ്ഞു വീണതാണെന്ന് സംശയിക്കുന്നതായി പൊലീസ് പറഞ്ഞു. കോട്ടയം വെസ്റ്റ് പൊലീസ് മേൽനടപടികൾ സ്വീകരിച്ചു. ഡല്‍ഹിയില്‍ നഴ്‌സ് ആയ ജിന്‍സിയാണ് ജോര്‍ജിന്‍റെ ഭാര്യ. ഏകമകൻ ജോൺ സി ജോർജ് ഒമ്പതാം ക്ലാസ് വിദ്യാർഥിയാണ്. സംസ്‌കാരം പിന്നീട്.