കോട്ടയം: അയ്‌മനം കല്ലുങ്കത്ര പള്ളിയുടെ കൈവശാവകാശ കേസില്‍ മുന്‍സിഫ് കോടതി വിധി വന്നതിനെ തുടര്‍ന്ന് പള്ളിയില്‍ പ്രവേശിക്കുവാനെത്തിയ ഓര്‍ത്തഡോക്‌സ് വിഭാഗത്തിന് മറുവിഭാഗത്തിന്‍റെ എതിര്‍പ്പ്. പള്ളിയില്‍ പ്രാര്‍ഥനക്കെത്തിയ വിശ്വാസികള്‍ ഗേറ്റിന് പുറത്ത് നിന്ന് പ്രാര്‍ഥന നടത്തി മടങ്ങി. ഇന്ന് (സെപ്‌റ്റംബര്‍ 16) രാവിലെ 10.30നാണ് സംഭവം.
കല്ലുങ്കത്ര പള്ളി വികാരിയായി ഓർത്തഡോക്സ് വിഭാഗം നിയമിച്ചിട്ടുള്ള ഭദ്രാസന സെക്രട്ടറി ഫാ. കെ എം സഖറിയയുടെ നേതൃത്വത്തിലാണ് വിശ്വാസികള്‍ പള്ളിയില്‍ പ്രവേശിക്കാനെത്തിയത്. എന്നാല്‍ വിശ്വാസികള്‍ എത്തുന്ന വിവരമറിഞ്ഞ യാക്കോബായ വിഭാഗം നേരത്തെ തന്നെ പള്ളിയിലെത്തി ഉപരോധം തുടങ്ങി. ഇരുവിഭാഗവും തമ്മിലുള്ള സംഘര്‍ഷ സാധ്യത കണക്കിലെടുത്ത് വന്‍ പൊലീസ് സന്നാഹമാണ് സ്ഥലത്തെത്തിയിരുന്നത്.